Jeder Dachdeckerg’sell wed zum perfekten Bürohengst…….

Ma muass sich ja scho emmer wieder wundra woher doch so manche Politiker ihre phantasievolle Ideea hernemmad. Und wenn es drum gad an Arbeiter länger schaffa zum lassa bliaht des grad zua auf, na ja, isch ja au Friahling. Und voar allem Fraua hand dau wohl herrliche Einfäll. Und isch des net au no g’schmoichlad das a Dachdeckerg’sell mit über 60ig locker a Arbad en dr Verwaltung übernemma ka???

I denk dia liebe von dr Leyen, dia liebe Ursula isch bei ihrer Idee dr’vo ausganga wia flexibl ma en dr Politik isch. Geschtern noch Minischterin fer d’Familie, heit Arbeitsminischterin, morga vielleicht für da Verkehr zuschtändig. Woiß ma’s? Und sia gad au dr’vo aus das dr Mensch ja nia auslernt, also grad em Alter um de 60ig rom no so a geischtiga Intelligenz aufweist das ma an jeda Handwerker vom Bau holla ka und in d’Verwaltung schtecka kennt. So tauscht dr Maurer sei Kell, dr Zimmerma sein Hammer und dr Dachdecker seine Dachziegl oifach aus und nemmt schtatt dessa an Computer und Zahla en d’Händ.

Isch jetzt nau aber die Tätigkeit en ra Verwaltung, em a Büro so leicht zum schultra das ma dau wirklich an jede em beschta Rentaalter neischicka ka? Des dät ja hoißa a Verwaltung zum schmeißa und mit deana Zahla und Buchschtaba zum joungliera sei a Kenderschpiel. Wobei ma sich aber scho au voarschtella ka das so a Praktiker a wenga meah vom Plana, Organisiera und Kalkuliera verschtad wia oiner frisch von dr Schual ra. Aber es gad ja meah drum an Rente zum schpara, d’Leit oifach bis zum umfalla schaffa zum lau dr’mit meah Geld fer Pensiona dr Politiker übrig bleibt.

Aber anschtatt dia Handwerker, dia alles von dr Pike auf g’lernt hand, nau an da Schreibtisch zum setza wär’s doch, wenn ma dia alle en Politik schicka dät. Des broita Fachwissa hand se allemal, an ganza Haufa an Lebenserfahrung brengad se au mit, und voar allem, sia hand an ganz an broita Buckl ond kenna mit jedem Handwerkszeig umganga. Und ma hätt se au net arg lang, denn nach oiner Period send se dann wirklich Rentner und ma braucht eahne koi Politiker – Pensio zahla. Dau dät dr Schtaat ja no meah schpara und dr Bürger hätt a mal a paar Praktiker dia unser Land regierad……………