" beste gegend "auf jeden Fall muas ma g`impft sei !

Vorpremiere im Cinerado Kino Pfaffahofa mit Kati, Jo und „Rosi“ Rosenmüller lebendig, zum ohglanga.

beste gegendauf jeden Fall muas ma g`impft sei !

Vorpremiere im Cinerado Kino Pfaffahofa mit Kati, Jo und „Rosi“ Rosenmüller lebendig, zum ohglanga.

Das ma an Regisseur und die zwoa Hauptdarstellerinnen nach an Kinofuim, direkt lebendig vor da Nasn hod und a no gfragt werd, obs oan gfoin hod, des is scho einmalig, für Pfaffahofa sowieso.
I hob mir jetzt den erst´n Teil vo der Trilogie von Tandern, was glei bei uns um´d Eckn is, ned ogschaugt, aber kapiert hob i glei um was das geht. Zwoa junge Madln de schaung woin wias Lebn geht und obs ned draus in da Welt anders is ois wia dahoam.
A wengal boarisch muas ma scho vasteh, sonst geht gor nix mit de Dialoge, aber as Gfui wias de zwoa mit ihra Gschicht vom Aufbrecha und Zruckkumma geht, wachst bei jedm rüber. „Da Rosi“ wias an Regisseur Marcus H. Rosenmüller hoasn, hod auf jedn Foi a ganz an Haufa Gfui für d Leid und ihr Hoamat. Da war Koaner in dem grosn Saal bei dems ned an irgend oaner Stell im Fuim warm worn war.
Ob des de Ratschn bei a Beerdigung, de Mamma mit da Kittlschürzn oder a Weiherfest mit alle Schikanen war, jeder kennt irgenwos und gfreid se das a gmoand is.
De Karin Michalke de des Drehbuch gschribn hod, da Helmut Pirnat an da Kamara, de Anna Maria Sturm ois Kati, de Roslie Thomass ois Jo und alle Andern a vo da Crew hamm den Fuim zu dem gmacht wos a is, sogt Da Rosi und Recht hod a, oaner aloa war do a aloa.
Schee das i eam kenna glernd hob, an Rosi mit seiner Freid am Leben und seine Madln, de so san wias spuin. Schee das eam gibt mit seim Gfui für d´Hoamat und de Gschichtn vo de Menschn de do leben. I bin scho gspannt wias im drittn Teil weida geht, mit Tandern im Dachauer Hinterland und was werd aus da Kati und da Jo.
„Auf Fahrtwind und Freiheit“ und an Platz im Lebn.

Da Mane
Manfred Habl

Da ROSI und Da Mane

LINK ZUM BUIDLALBUM - draufdrugga

LINK ZUR HAUSSEITN AUF DEITSCH -draufdrugga-

LINK ZUM KINO IN PFAFFAHOFA

Autogrammstund

Vorpremiere im Cineradoplex

..und wia wars ?

Hemad für Alle

AB 3.Januar 2008 NEU im KINO