Der Fasching damals

Asbach Cola, Commodore und Konfetti

FEUERWEHRBALL ANNO 74

Samstag auf d'Nacht isch Feierwehrball
do hammer a Mordsgaudi auf jed'n Fall
Beim Mayr Otto droba im großa Saal
gibts heit Blosmusik und Damenwahl
Gsoffa weard und tanzt und glacht
bis der ganze Schiasser kracht
Nachts um Zwölfe kemmer kaum no steha,
sonntags will koiner in d'Friahmess geha!

Um Achte haut dr Commodore sei Rede naus
schaut im bunta Hemad wia Afrikaner aus
Doch koi oinziger horcht ihm wirklich zu
und alle schrei'n: "Daktari ruft Wameru!"
Do packt er sei Klara, dia runde gsunde
und dreht mit ihr die erste Walzerrunde
And're Mannsbilder bleiben liabr no bissle sitza
wolln unter zwoi Halbe net beim Tango schwitza.

D'Bedienung rennt treppauf mit Knedl und Soß
Scho hot dr Hubert sei ganza Soß auf dr Hos
Dr Ludwig loßt si a süffiga Goißamoß schmecka
Dr Toni tanzt mit dr Vroni wia dr Lump am Stecka
Dr Michl verzählt uralte Witz über dia koiner lacht
alle wartens bis um Zehne endlich d'Bar aufmacht
D'Musikanta spieln a "Prosit der Gemüatlichkeit"
Auf unserm Dorf gibt's koin schönera Tag wia heit!

Beim Kasatschok werd jeder Kreizlahme munter
In dr Stub drunt moinens glei käm Decke runter
Bei dr Polonäse ziahts alle aufn Tanzboda naus
Nach 3 Asbach schaun gar Schiache wia Engl aus
Dr Hermann stiert glasig in dr Susi ihr Dekolleté
moint d'Aussicht über Berg und Tal isch heit schee
Doch dr Scheich hinter ihne isch dr Susi ihr Ma,
droht dem Glotzer a paar saftige Bockfotzn a.

Dr Hansi gruschdelt unter dr Lisbeth ihrm Gwand
In mein Mosskrug schwimmen Konfetti umanand
D' Brigitte mog ihre Schenkel an meine reiba
Dr käsweiße Reinhold moint, er muß glei speiba
Mir werds o langsam schlecht vom viela Raucha
A Maul voll Frischluft kennt mer etzt alle braucha
Um Sechse in dr Friah muaß dr Otto in Stall
Do wackeln mir halt hoim vom Feierwehrball!

Aber dr Fasching isch für heier no lang net vorbei
Näxscht Woch wer mer alle aufm Schützaball sei ...

(Hinweis: alle in diesem Text genannten Namen sind frei erfunden)