Wer hat die Hosen an....????

Die VHS Ziemetshausen bietet ein Seminar oder Vortrag über die Probleme der beiden Geschlechter in ihrem Zusammenleben. Und wie intensiv diese Probleme auch sein mögen, letzten Endes verläuft es immer wieder harmonisch zusammen, denn zuhause daben die Damen das sagen.......

Duat ma heit jemand frauga, wer denn des Saga hat,
so isch nau drauf dia Antwort doch moischtens oifach glatt.
Es send doch moischtens Fraua, dia führad s’Regiment,
ja au net arg viel anderscht als ma’s von friaher kennt.

Es war im Paradiese fer d’Eva au scho schea,
dau isch ihr doch dr Adam au scho gehörig g’wea.
Socht hätt er wohl dean Apfl ja au net gessa g’hett,
so hand au jetzt dia Männer all no des gleiche g’frett.

Wenn all jemand au Recht hat isch vorna rei scho klar,
dia weibliche Geschlecht wia’s alla wei scho war.
Drum gad dr Ma zum Schtammtisch wo er was saga derf,
dau schpielt ja au nau koiner mit seinem letschta Nerv.

Nach außa send se hörig de Männer ganz und gar,
dau kennt ma ja fascht moina, dau sei es wonderbar.
Doch duat dr Ma was saga was ihr net so recht g’fällt,
nau wed dr au dahoi glei scho fascht an d’Wand na g’schtellt.

Duat ma mal diskutiera um was au immer gad,
des letschte Wort des Fraule au dau alla wei hat.
Und um des Frieda Willa geit halt dr Ma ihr Recht,
denn soscht ka er ihr werra em Leaba nia gerecht.

Ma muass dr’zua au saga sia hand scho manches G’schpür,
des isch halt oifach besser drum ma ma’s se dr’für.
Dau send halt nau dia Männer au wieder ganz gerecht,
denn manche solche Ei’fäll von eahne send net schlecht.

A Ma duat des au zuagea und diskutiert net rom,
denn Männer wissad ja au des wär au ganz schea domm.
So leabt sich’s oifach besser so zwischa Frau und Ma,
weil ma doch letschten Endes ja so nix ändra ka.........