Als Büddenred für da Fasching so dacht.......

Dr Herrgott sait, es seiad alle gleich,
egal ob oiner arm isch oder reich,
belohnt wird von eahm a jeder recht,
ob er jetzt guat isch oder schlecht.
Inzwischa geltad andre G’setz
und ganz andersch isch des G’schwätz,
drom bild i mir heit halt mal ei,
i mecht au a mal a Politiker sei.......

Mit meiner ganza schtarka Manneskraft
hau i des ganze Leaba bloß viel g’schafft,
und was übrig bleibt am Monatsend
isch zärtlich g’sait, a wahra Send.
Von Gleichheit sieh i gar koi Schpur,
bloß fer da Schtaat, ganz rein und pur,
drom bild i mir jetzt halt mal ei,
i mecht au a mal Politiker sei.......

Über mi wedd allwei bloß beschtimmt
was ma mir gibt und was ma mir nimmt,
was i zum doa hau und was net,
wo i grad des oine doch so geara dät.
Und oine send halt gleicher wia gleich
und au grad a so no reicher wia Reich,
drom bild i mir jetzt halt mal ei,
i mecht au a mal a Politiker sei.......

A Jeder sait mir was i verdeana derf
und trifft dr’bei mein schwacha Nerv,
au was i dr’für alles leischta muass,
und des mit ma recht scheana Gruaß.
Und au no wass i alles ausgeaba soll
dr’mit es der Wirtschaft wieder gad ganz toll,
und drom bild i mir oifach ei,
i mecht au a mal a Politiker sei.

Und schwätzt mi dau oiner jetzt bled a
ob i mir des ganze au a doa ma,
weil des so viel an Verantwortung sei
und koin Tag net hasch wo da bisch frei.
Net a mal alloi derfsch zum Biesla gau
ohne das a Bewacher drum rom muass schtau,
so denk i mir all no ganz neababei,
i mecht trotzdeam au a mal a Politiker sei.

Nau fliag i in dr Welt so umanand,
ib’rall na, was mir no unbekannt.
I leab vom Schteuerzahler voll und ganz
im a ganza Prunk und in ma Glanz.
Und koi Gesetz des au fer mi gelta dät,
koiner der an mei’m Bankkonto dreht,
ja, dau bild i mir richtig schea ei,
i mecht au a mal a Politiker sei......

Zum Denka, dau hätt i halt meine Leit
und dia schreibad als wär i superg’scheit.
I kassier natürlich a ganz guata Diät,
nau wed in dr Wirtschaft no a wenga dreht,
friß mi durch an jeder Feschtivität
das dr Ranza schtad dass alles d’schpät.
ja, so bild i mir ganz geara ei,
i mecht au a mal a Politiker sei.....

Und bau i mal an groaßa Scheiß
zahlt des Volk so wie so da Preis,
Guck oifach dass i Pensionsberechtigt bleib
und bis dau na a ruhiges Leaba treib.
Dr’nauch guck i aber au glei
dass i en d’Wirtschaft komm graoß nei,
denn nau bild i mir au ei
so a Manager zum sei.

Dau kassier i no mal des ganz groaße Geld
und dua alles des was mir ganz guat g’fällt.
Schtell Leit aus dass d’Firma schpara ka
un mei Gehalt schteigt schtändig a.
Dau gad mer’s besser wia en dr Politik
und leab ganz guat mit der Kritik,
ja, so bild i mir des geara ei
und mecht a mal a Manager sei.....

Und bau i wieder an ganz groaßa Scheiß
zahlt d’Firma eh da ganza Preis,
i fliag mit ra Abfindung zwar groaß naus,
bei zig Milliona macht mir des gar nix aus.
I setz mi nau im Ausland irgendwo aa
wo koi deutsch’s Finanzamt ka ebbes saa,
ja, so bild i mir des geara ei
und mecht a mal so a Manager sei.....

Oh mei, was bild i mir alles ei
und was kennt i dau doch alles sei.....?
Wär i denn mit deam ganza doa
au wirklich richtig froah???
I moi dass i liaber ehrlich bleib
und weiter über all dia schreib
dia sich bildat ja wirklich ei
guate Politiker oder Manager zum sei..........