Müllentsorgung leicht gemacht....

Es isch scho wauhr, dr Müll überhäuft manchen Haushalt. Gebühra gand nauf, a größra Tonne wär zu teuer und zu groaß, die jetzig roicht net aus. Ma kommt au net drum rum, so hats da Anschein, vom Supermarkt a jedes Verpackungsteil mit hoim zum nemma. Aber a offenes Feuer derfsch au net em Garta macha, so wia ma früher halt alles brennbare ins Ofaloch g’schoba hat. Doch bevor ma im Müll verschtickt muass er halt weg. Und des wenn möglich koschtagünschtig.

Dau isch es nau scho hilfreich wenn dr Nachbar sei Tonne schea zugänglich schtanda hat. Ja und vielleicht isch’s gar no a öffentliches Gebäude, dau isch nach 17 Uhr eh koiner meahr dau. An de Friedhöf schtandad auch Container und Tonna, Und dann gibt es ja all no dia öffentliche Abfallbehälter an jeder Schtaußaecke, an de Schpielplätz und Einkaufszentren. Wenn des Angebot so verlockend und billig isch, warum also selber sich a größre und teuere Tonne zualega? Warum am Abfall und Müll au no schpara und eahn im Supermarkt lassa?

Kommune soll halt oifach täglich ihre öffentliche Mülleimer leera, nau hat dau täglich au mehr Platz. Und dr Nachbar, der soll halt sei Tonne so wähla, das i no was nei doa ka, und wenn net, nau hat er halt Pech g’hett wenn se überfüllt isch und net g’leert wird. Des muass nau ja net mei Problem sei. Und wenns halt gar net andersch gad, nau ka ma so a Tüte Müll ja au mal im Wald oder dr Flur hinter oim Baum abstella. Irgendoiner wird es scho verräuma.

Ja, so isch es heit, in unserer Zeit, jeder Müll wird auf da andra abgwälzt, so das ma selber als Saubermann dau schtad. Das ma aber au mal selber versuacha dät am Müll a bissle zu spara, des grenzt scho unsra Bequemlichkeit aus. Doch Gottseidank gibt es no Leit dia da Gang zum Wertschtoffhof net scheuad...........