Aufgefallen

Unser Essa beeinflusst des Klima und schützt da Regawald, so hoißt a Tipp des Tages für a guates Klima. Vegetarisch isch am g’sundeschta für Mensch und Umwelt. Denn so braucht ma weaniger Rinder und Schweine züchta und ka so des schädliche Kohladioxid verringra. Wer hätt denkt dass ma für oi Kilo Rindfleich glei 6,5 Kilo von deam Kohladioxid verbraucht? Für a Gemüse in der Größe jedoch bloß 150 Gramm. Des isch natürlich a Unterschied.

Doch gravierende Umweltverschmutzer sind net Auto sondern d’Rindvieher. Ka ma jetzt seah wia ma’s will, aber laut Schtatistik hand mir heit 1,4 Milliarda dr’vo. Des sei um’s vierfache meahr wia no voar hundert Jauhr. Und so käm wirklich letschtendlich auf jeda Familie oi Rindvieh. Und als Wiederkäuer produziert des Rindvieh im Maga Methan und schtoaßt des beim Rülpsa aus. Und des Methan sei oifach 21-mal klimaschädlicher als des Kohladioxid.

Jetzt isch dia Frage, sind des bloß dia Rindviecher oder au Gäul, und isch dann somit der umweltfreundliche Pferdekutscher gar net so umweltfreundlich? Isch dann a Reiter no dr Größere Umweltverschmutzer wia dr Autofahrer? Ma könnt aber au glei wieder rationell denka und doch des Methangas auffanga und in Energie umwandla, so zu saga dr’mit glei meah a nuia Art von Biogasanlage betreiba. Ma müsst dia Viecher bloß irgendwo nei rülpsa lassa und net in dia freia Luft naus.

Um unsra Umwelt zu schona soll ma Regionalprodukte kaufa. Doch dass dia Globalisierung und des umanandfahra von Produkte dr Umwelt schada duat, dr’zua braucht ma weder Nobelpreisträger no Greenpeace um des zum verschtanda. Aber wenn des oiner verzählt der net g’schtudiert isch und koin Professora - oder Dokortitel vorna weg hat, dann isch des eh nix wert. Und dau ka ma als Bürger no so auf da LKW - Transit schimpfa, bemängla dass ma Gurka und Tomata erscht durch halb Europa fahra muass bevoar se auf da ladatisch kommad, dau wird ma bloß ausg’lacht.

Interessant wär es aber no was eigentlich dr Mensch alles für umweltschädliche Produkte naus blausad? Hat mal scho oiner g’messa was bei dr Luftentweichung hinta naus, vom Darm her, des unter umschtänd ganz schea schtinka ka, alles enthält? Wer woiß, vielleicht beeinflusst sogar dr Mensch selber des Klima au ganz schtark oder aber lasst wichtige und nützliche Gase frei dia ma wieder verwenda könnt..........?