Krumbach’s Robert - Steiger - Straße bekommt neues Flair......

Als oina vo de erschte Krumbacher Schtraußa soll von Moi bis Oktober a nuies Flair kriaga. D’Robert - Steiger - Schtrauß im Bereich Hürba hat es au dringend notwendig. Ob jedoch alle Planunga für alle Gerecht wird, des wird sich erscht mal zoiga, oder send gar d’Schildbürger mit am Werk g’wea???

Robert Steiger, einer der Gründer der Textilfirma Steiger und Deschler, jetzt UTT, wed sich fraia. Denn seit Jahren wed sei Schtrauß allawei bloß g’flickt und isch, wia mancha andra au, zu ma Flecklesteppich worra. Doch Dank Schtadtsanierung soll au dia Schtrauß a nuies Flair erhalta und dia Schtrauß a scheana Charakter. So jedenfalls hat ma es em Schtadtrat au beschlossa und d’Ausschreibung fer da billigschta Anbieter isch dussa.

Wa es hoißt, soll zwischa Moi und September - Oktober dau a Bauschtell sei. So isch es mal geplant. Doch was sonscht no alles geplant isch, manches grenzt scho an so an Schildbürgerschtreich. Während dia ganz Schtrauß an scheana einheitlicha Charakter hau soll, schpielt es beim Gehweg koi Rolla. Dau isch grad noch wichtig das von dr Karl - Mantel - Schtrauß aus, so weit dr Blick roicht, em Auge ebbes bota wird. Was nau kommt, isch egal. Des hoißt, a Schtück weit geit es an pflaschtrada Gehweag, und nau roicht es wenn man teert. Es gad ja bloß um da Einblick, net um da Weiterblick.....

Und au dia Planunga was dia Beleuchtung anbelangt, au dia send scho voll em Gange. Ganz genau hat ma da Schtandort scho feschtg’legt. Doch bei der Planung muass ebbes schiaf g’laufa sei. Irgendwia war wohl der Plan net recht zum entziffra. Oder aber, es war oifach bloß wichtig dass der Abschtand von deane Latteramaschta oifach schtemmt. Und dau isch es nau au net wichtig des voar Ort nomal zum kontrolliera, denn es könnt ja vielleicht a Hinderniss em Weag schtanda.

Und so isch halt a Arbeiter von de LEW komma und hat sich des nau wirklich voar Ort a guckad. Denn dia müssad ja au ihre Planunga macha. Voargeah von dr Schtadt isch, alle Maschta kommad auf dia Linka Seita, Richtung Norda g’seah. A Schtück weit haut des au ganz guat na. Bloß an zwoi Schtella hat dr Angrenzer a kloi Problem nau. Denn sei Frontseita müsst er komplett umbaua. Der Maschta na g’setzt wia em Plan, kommt nau direkt in d’Mitt von seiner Ladatür. Dr nächschte Maschta direkt en d’Mitt voar seiner Eifahrt zu sei’m Garta.

Des Positive dra, er sich auf jeden Fall guat ausg’leuchtad. Doch fer des was er vielleicht an Beleuchtung schpara ka müsst er g’wieß des dreifache inveschtiera damit wieder sei Kundschaft da Lada betreta ka und er au en sein Garta raus und nei fahra ka. Des Problem wär leicht zum beheba, wenn ma dia Maschta mal rechts und mal links setza dät, so wia es en solche Schtraußa üblich isch. Was sich jetzt dia Planer eifalla lassa deant, auf des isch jetzt net bloß der Ladabesitzer g’schpannt, wer woiß, vielleicht geit es am End au no a durchgängig pflaschtrader Gehweg??????........