Krumbach scheaner und greaner???

Des isch au a ewiges Thema. Krumbach soll Kneippschtadt werra, soll Tourischta a ziah und soll a nettes hoimliges Schtädtle sei. Was hat ma sich net scho fer Gedanka g’macht, zom Omsetza hat allerdings s’Geld g’fehlt. Wia viel Planunga send scho auf’s Papier braucht worra, hand viel Geld koscht. Wia viel Gedanka von de Leitbildgruppa, dia ma mal ens Leaba g’ruafa hat, hat ma unter da Teppich kehrt. Und das ma alloi vom diskutiera, plana und schwätza.nix erroicht, des isch a jeder Grundschüler scho.
Doch jetzt isch doch glatt oiner her ganga, ohne da Schtadtrat zum frauga, und hat für zeha Kugelahornbäum Schponsora g’suacht, und g’fonda. D’Schtadt hat’s koi Geld koscht, no net, außer s’ einpflanza und aufschtella, entlang dr Karl-Mantl-Schtrauß. Aber, außer em Burges Fischer, dr Verwaltung und em Bauhof hat des koiner g’wisst, bis en ra Schtadtratsitzung dia private Aktion bekannt gea worra isch. Ja net a mal g’fraugat isch dr Schtadtrat worra ob er es vielleicht au fer guat halta dät, voar Ort a Besichtigung g’macht hätt om’s en de Ausschüss dr’über berauta zum könna. Des war natürlich scho a schtarkes Schtuck. Des ka net a mal em Burges sei erschter Schtellvertreter und ehemaliger Schualfreind verschtau ond muass scho knallhart kritisiera. Wobei ma da Anschein hat, dass sich dia zwoi gar net grea send, wia ma des auf verschiedene Veranschtaltunga emmer wieder merkt und sieht.
So hat ma jetzt em Beisein von a paar Oinzelne aus em Schtadtrat dia Kugelahorn en gewöhnungsbedürftige orange Kübl en Form von ma kloina Schtraußafescht mit ra Geschenkurkunde an d’Schtadt übergea. Dass sich net a jeder glei dr’mit a’freinda ka lasst ma sich eigau, aber sait ma net au „Ma g’schenkta Gaul guckt ma net ens Maul“? Und wenn Ende 2010 eh dia Schtrauß auf Voprdermann braucht wird, so ka ma dia Bäum au mit einpflanza und koschtat koi Geld meah. Und ob jetzt dr Bauhof zeha Bäum meah giaßt oder net, des macht s’Krtaut au net fett. Aber vielleicht kennt ma ja au jedem Schtadtrat a Giaßkanna schenka..........