Kommunalwahla 2008.....

„60 Jahre und kein bisschen Weise“ könnt ma jetzt dau saga, denn voar ma guata Jauhr hat dr Krumbacher Burges net grad so guat her g’seah. Ma hat sich Gedanka g’macht oder er es no a mal packt, i moin jetzt des kandidiera. Nach deam Zusammenbruch auf dr Bühne beim Bieranschtich hat’s net so guat ausg’seh. Ja ma hat scho g’moint, es wär des letschte Fässle, des dr Willy a’schticht.

Aber dr Herrgott im Himm’l oba hat andersch entschiede und heit sieht er fascht wieder blendend aus. Und des macht wohl au aus weil er woiß das er sein schpitziga Humor no net verlernad hat. Aber vielleicht woiß au dr herrgott dau doba das dr Willi ja no net fertig isch. Als Lehrer wär er scho fast in dr Pension und hätt’s g’schafft. Aber als Burges schafft ma halt net alles in oiner Periode, schleust ma halt net alles so durch wia d’Schüler en oim Jauhr.

Frei nach deam Motto „Rente erst mit 67“ gad dr Krumbacher Burges no mal an sei Werk, denn mit oinasechzig packt er des no mal locker. Dann ka er mit sieb’nasechzig getroscht na getan’ner Arbad sich zur Ruhe setza. Und so hat wohl au sei CSU denkt, und so au dia Freie Wähler und dia Junge Union. Und von dr SPD braucht er nix befürchta, denn dia hand nix womit se glänza könntad. Vielleicht a Fremder bringa, durch a Ausschreibung, so wia ma es in Württaberg macht.

Interessanter isch a Wahl natürlich scho wenn ma an Gegakandidata hat. So muass ma um dia Schtimma halt no kämpfa. Des braucht dr Willy net, und des schpart dr Fraktion Geld und em Willy Kraft. Net wia voar sechs Jauhr, von oiner zur nächschta Wahlveranschtaltung renna, des mal ka er’s ruhig a’gau lau. Eahm ka ja nix passiera, au net im Kreistag, dau g’heart er scho lang zum Inventar.

Aber oifach wed er es net hau, ma woiß net was all’z en Schtadtrat nei kommt, denn a Burges hat halt dau au bloß oi Schtimm. Wenn der au mal wieder durchg’schüttelt g’heart, sdo wär es halt scho Vorteilhaft wenn Praktiker dia Theoretiker überraga dädat. Zwar mauss a Baum langsam wachsa, im Hinblick auf die Kneippschtadt, so hat mir a Schtadtrat eascht mal verzählt, doch auf dr andra Seita derf ma halt da Zug au net verpassa. A schnellwachsender Baum ka ei’ganga, aber in dr heitiga Zeit woiß ma au net wenn dr nächschte Zug kommt weil d’Lockführer grad schtreikad.

Auf jeden Fall, dr Rathauschef isch nominiert und es wed au koi zwoiter aufschtanda. Und in sechs Jauhr, dau isch nau dr nuie scho her zoga und i denk a mal, ma woiß heit scho wean ma dau nominiera wed. Und ma derf au oins net verwechsla, a Burgamoischterwahl hat nix mit dr Partei und Fraktio zum doa, sondern isch a Personawahl. Doch ebbes muass scho au no g’scheah bis zur Wahl, ma muass de Leit wieder klar macha das se na gand und net hinter her maula deant. Ma muass em Bürger wieder zoiga, das er dia Macht hat, wer in dr Schtadtpolitik des saga hat.