Zu was Kultur, koscht eh bloß Geld.......

Ma derf scho behaupta dass grad mir Deutsche, mir Bayern und Schwauba a tolla Kuturgeschichte hand. Doch wer mit dem eigentlicha Wort Kultur nix anfanga ka: Kultur ist die Geschichte, nicht politisch, eines Landes und deren Menschen, deren Arbeit und deren Werken! Und mir dürftad uns scho a Scheibe von anderen Ländern abschneida, dia so was no wirklich zu pflega wissad. Ma interessiert sich für alle mögliche fremde Kulturen, in alle ferne Länder reist ma na, bloß dahoim, dau dät ma se nieder macha wolla. Alles wird beschtaunt wia schea Pyramidea sind und dia asiatische Kultur, von dr schwäbischa jedoch, dau hat ma koi Ahnung, kennt sich em oigena Land net aus. Isch au net wichtig, interessiert ja au koin, ma ka sich nur wichtig macha wenn ma über China reda ka.

Mir sind wirklich a Traditionsreiches Land. Grad Bayern und Schwauba, die Romantische Schtraße, unsre Königsschlösser, welch a Vielzahl von Tourista ziaht des a, aber in bin mir sicher, 50 % von uns kennad des nur vom Höra und Saga. Es gibt bei uns so viele Überlieferunga in allen Bereichen, mündlich und schriftlich, unsre Archive sind voll von wertvollen Dokumenten, alles was unsre Ahnen und Vorfahra g’schaffa hand, wovo mir heit zehra könnad. Und sei es bloß unsra Mutterschpauch, unsern Dialekt, der uns Schwauba, Bayern, zu ebbes b’sonderen macht. Könnad mir dau drauf net schtolz sei? Ich es net ebbes scheanes schwäbisch zum schwätza?

Kultur und Tradition, ma findat des sowohl in dr Musik wia au in dr Kleidung, in dr Tracht. Wär es net a verlorenes Wissa wenn ma des alles oifach über da Haufa schiaba dät? Ka es uns denn wirklich so egal sei was unsre Vorfahra anzoga hand, wia se g’schaffa und g’leabt hand? Resultiert denn aus deane ganze Überlieferunga net unser heutigesch Schaffa? Isch es net interessant zu wissa, wia unsre Ahnen ohne unsre heutige Technik auskomma sind? Welche Bauta doch voar 200 oder 1000 Jauhr entschtanda sind, dia bis heut g’halta hand, welcha Architektur es damals geaba hat? Grad wenn ma unsre heutige Bausünda angucka muass! Unsre Betonbunker, dia nach 30 Jauhr scho zum brösla afanga deant.

Mir hand wirklich ebbges an Kultur und Tradition zum bieta. Ganze ferne und fremde Völker wissad des, schätzad des, bloß mir selber net. Und immer mehr Kultur und Tradition verschwindat, weil se für manche teuer und schtörend isch. Biergärta, Kirchaglocka, Blasmusik, Kuahglocka, ja sogar dr Gockl auf em Mischt isch zur Seltaheit g’worda. Alles was oim net angenehm isch, au wenn es Tradition isch, a Schtück Kulturgeschichte, muass es manchem egoistischa Banausen weicha. Schade au das mir so wenig Kultur – und Traditionsbewusste Leut an de Gerichte als Richter beschäftiga deant. Dann würd des oine oder andre Urteil vielleicht au a bissle anderscht ausfalla. Vielleicht zu Gunschten von Kultur und Tradition!