Was uns doch net alles beschäftigt

Neuigkeita dia nirgends in ma Blatt g’schrieba standad, dia ka ma beim Metzger, im Supermarkt oder oifach beim Tante Emma Lada erfahra. Und was dia doch alles wissa deant, des isch hochinterssant. Bestimmt hand dia an siebta Sinn. „Hasch des au scho g’heart.....“, so fangad se a. Und nach deam jeda von deane Kattla ja gar net neugierig send, folgt glei drauf „ja was denn, komm verzähl......“ Und nau kommt erscht mal dia ganz Nachbarschaft dra. Denn des junge Mädle dau, des deaner en letschter Zeit allwei schlecht isch, grad 17 Jauhr alt, und dau kommt all so a Kerle, dia isch schwanger. Woher soll es ihr denn sonscht so übl sei, ma kennt sich ja schliaßlich aus.

„Ja und woisch des au scho.....?“ gad’s nau weiter. „Ja was denn, komm verzähl.....“ folgt wieder drauf. Und nau kommand dia männliche Schandtata ans Liacht. Dr oine, der en dr Friah um halba Fünfa total b’soffa hoim komma isch. Aber es ka ja au net andersch sei, wo doch sei Weib an Hausfreund hat, der doch schtändig ein und aus gad. Ja und dia sell dau, dia hat erscht a blaues Aug g’hett. Vom Alta kriagt dia allwei Hiebe. Ma hats zwar no nia g’seah, aber woher soll’s denn sonscht au komma. Und dia oina dau, grad zuazoga, dia luthrische, sieht ma nia in dr Kirch, dau gad er ja au neaba naus. So ebbes woiß ma halt ganz oifach.

Und weil ma beim Huaber a nuies Auto hat, nau hand dia doch im Lotto g’wonna, ma mecht bloß wissa wia viel. Interessant wär scho au wo ma beim Müller des Geld verdeana duat wenn ma em Jauhr glei dreimal in Urlaub fahra ka, weil selber isch ma ja no nia naus komma. Aber ma woiß ja, dass der net so viel verdeana ka, bei deam Job wo der macht. Ja und ma woiß au glei dass dr Maier ausg’schtellt worda isch, war ja au bloß a frage der Zeit, dean faula Hund will doch neamad. Dass der aber grad sein alta Urlaub weg nemmt und drum 5 Wocha am Schtück dahoi isch, des will ma net wissa.

Ja ja, was uns net alles ebbes interessiera duat. Und ma woiß heit scho was morga dr andre denkt und woiß wenn ma übermorga sich wieder trifft. Und wenn es sonscht nix gibt, nau lasst ma ganz oifach a ganza Roiha von Leit schterba. Denn des hat ma ja scho lang g’seah dass dau nix mehr wird. Ja ja, wenn ma dia Ratschkattla net hätt, nau dät ma glatt irgendwann total unwissend von deaner Welt gau....... aber Gottseidank.......... a jeda Schtadt und a jedes Dorf hat so was, und dia, dia schterbad beschtimmt nia aus.