Was mykrumbach ausmacht…..

A jeda Schtadt fer sich isch schea,
es muass ma halt bloß richtig seah.
A jeder hat fer sich sein G’walt
Und sieht’s womöglich anderscht halt.

Persönlichkeita geit es viel
dia en Krumbach send em Schpiel.
Künschtler geand sich dau au d’Hand,
des isch bis Paris bekannt.

So mancher hat sich g’mault sei Bild
und im Herza Krumbach g’fühlt.
Ob’s dr Rakel isch oder d’Marianne Rieß,
alle send se guat, ja des isch g’wiß.

Es schtellt aus Paris au bald meah aus
Der Wahlkrumbacher Mauler Martin Gaus.
Vom Schorer Otto hängt übrall a Bild
wia er sei Heimat hat a so hat g’fühlt.

Dr Martin Egg a Krumbacher au isch,
wenn als Poet au nimmer so ganz frisch,
so isch mit über neiz’g sei Herz no dau,
duat dr leib au s’Ottabeura schtau.

Doch neaba viele prominente Leit
es en Krumbach arg viel scheanes geit.
Duasch an dr Kamml entlang mal gau
bleibsch geara zum genießa a paar mal schtau.

Am Krumbächle isch’s au ganz idyllisch schea,
beim Schpaziergang kasch au so viel seah.
D’Mühlkapell an dr Mühlschtrauß dont
geit zum Einlass allawei an Grond.

Und beim Gang durch dia herrlich Schtadt
So manch’s Wirtshaus au am Weagrand schtad.
Cafe’s, Eisdiela, Bar’s ladad zur Eikehr ei,
a Kneipatour hasch beinander glei.

Was mykrumbach all’z zu bieta hat!
Dr Nabl dr Welt isch dia Kammlschtadt.
Des macht mykrumbach grad ja aus,
a Auga und au a Gaumaschmaus!