Technik dät’s möglich macha, aber......

Wenn ma sich des mal so überlegt und zurück denkt, so hat ma früher mal, ohne dia viele Geschwindigkeitsbeschränkunga, Autos mit Motora baut wo 100 PS scho sehr viel war. Heut send es 200 PS dia fast d’Regel sind. Kloine Flitzer sind es, dia total übermotorisert sind, ma braucht ja Pfeffer im Auspuff, und es muass ebbes nei laufa.

Hat unser oins mit 18 no a Auto kauft um de 40 PS, so fahrad dia Fahranfänger heut Auto mit 140 PS und mehr. Und so kommad au dia ganze Unfäll her, aber des schockiert weder dia Autoindustrie no dia Versicherunga. Beim Motorrad hat ma mal a motorische Beschränkung eing’führt, aber mit em Auto dürfad sich dia junge Leit ja gern dr’renna. Und ma hat ja dia Raser gern auf dr Schtrauß, denn dia verbrauchad ja mit ihre hochmoterisierte Maschina au a Menge an Schprit.

Ganz sicher sind in de verschiedene Schublada von Ingenieure Pläne mit schparsame Motora. Isch unsre Technik net scho so lang so weit das ma au 5 Liter Autos baua könnt? Müssad 200 PS unter der Motorhaub verschteckt sei? Aber will des denn dia Mineralölmafia wirklich, wollad des dia Versicherunga? Wenn ma sich mal überlegt wo ma denn a Auto scho voll ausfahra ka, wenn ma nach de Tempolimits fährt, nau braucht a Auto au net mehr wia 150 km/h laufa, und koine 250, wo 15 bis 20 Liter immer no durch da Auspuff blausad werrad.

Aber es liegt am Verbraucher, es liegt scho au an uns, denn dia Nachfrage regelt da Markt. Und so lang mir alle dia Mafiosos unterschtütza deant, so lang kassiert dia gnadenlos ab. Und vielleicht
soll es au dem Gesetzgeber a junges Menschaleaba viel wert sei, es soll jedem a jeder Unfall von junge Leit am Herza liega. Kloinere Autos verbrauchad weaniger Schprit und rettad durch langsamere Auto au mehr Leaba. Vielleicht sollt ma drüber mal nauchdenka?