Ob’ ebbes braucht oder net……
.....ma muass es halt nemma. Viel Schpielerei dät's gar net braucha weil ma's vielleicht au gar net verschtad, aber ma kriagt's. Dr'bei gat's net mal um da Kompfort, sondern dass ma halt da hoha Preis rechtfertiga ka. Und so lang wia dia öffentliche Verkehrsmittl no so unflexibel sei könnad, so schnell brengt ma au mit hohe Schpritpreise net weaniger Autos auf d'Schtrauß. Und Gott sei Dank gibt es immer wieder em Jauhr Ferien, weil halt grad au dau dr Eikauf vom Rohöl all so um de 15 % nauf gad. Logisch dass des koi Mineralölhändler verkrafta ka und weiter geaba muass............
Nach deam wird heit gar net g'fraugt, sondern ma kriagt es oifach mit. So viel Technik wia heit en so ma Basismodell scho denna isch, dr’zua no recht viel Geld koscht, gerechtfertigt für d’Autoinduschtrie bloß da gehobena Preis. Sicher, wer’s will, der soll’s hau, der soll’s nau au zahla. Es gibt sicher koin Nauchtoil ohne Vortoil, so send dia Auto heit scho schparsamer wia früher. Doch des hebt sich em Geldbeutl heit eh auf, umweltfreundlicher send se, des muass ma zua g’schtau. Doch warum kam a en Frankreich zum Beischpiel serienmäßig Dieslfilter eibaua und en Deutschland isch des no net? Wo mir Deutsche doch sooooo fortschrittlich send! Warum muass ka Reimportiertes deutsches Auto billiger sei als wia wenn i es dau glei am Werk kauf?
D’Autoinduschtrie isch alt scho a wichtiger Wirtschaftszweig bei uns, hat an langa Rattaschwanz. So zum Beischpiel d’Mineralölinduschtrie. Es isch scho komisch dass all grad wenn Ferien send dr Eikaufspreis em Rohöl nauf ganga muass! Dau könnad dia doch erzähla was se wollad, von weaga ma ka dia 15 % net schlucka, muass se an da Endverbraucher weiter geaba. Des duat doch a jeder, selbscht en dr Fracht von jedem Teil wird heit alles aufglischtad, inkl. Maudgebühra.
Wenn ma sich nau wenigschtens auf dia viel angepriesene Bahn verlassa könnt, dia dät au lukrativer fahra wenn se des Wort Flexibilität kenna dät. Aber so lang ma von Augschburg auf Krumbach bald länger braucht als wia mit em Auto von Krumbach nach Müncha, nau isch doch ebbes verkehrt. Und was könnt ma LKW schpara, dia zwecks Maud all no unsre Land – und Bundesschtraußa kaputt machad, wenn ma dau meah auf’s Gleis bringa kennt. Aber bis Bahn ahlt oi Teil zum Kunda brengt isch moischt des ganz Auto scho fertig, um mal bei deam Thema zum bleiba.
Flexibilität fordrad ma vom Kloina, mit allem, in allem. Aber au bloß damit ganz oba schea abkassiert werda ka. Und wenn heit dia groaße Bosse und Manager bloß a angemessanes Gehalt kriaga dätad und fer ihren Murks au na schtanda müsstad und net no Milliona Abfindung abkassiera könntad, nau könnt sich dr kloine Ma sicherlich au öfters mal a nuies Auto leischta.
Kommentare
Sie möchten kommentieren?
Sie möchten zur Diskussion beitragen? Melden Sie sich an, um Kommentare zu verfassen.