Managergehälter gega Arbeitslöhne

Es isch scho arg übertrieba was uns doch net alles a grechnad wird. Mir sollad all no meahr g’schröpft werda, es fällt deam Land und seiner Regierung all no meahr ei wo se uns no ebbes holla könnad. Klar, sait dau jeder, dr kloine Arbeitnehmer isch in dr Mehrzahl und a graoße Herde Kleinvieh gibt meahr Mischt wia a kloina vom Graoßvieh.

Was aber gar net berücksichtigt wird, wenn ma deam Kloivieh meahr Fuader geaba dät, nau dätad dia ihren Mischt wenigschtens em Land lau und ma könnt aus deam wieder meah G’winna macha. A Groaßvieh wird g’fiadrad ohne Ende, bis zum platza bald, so viel das es gar net a mal alles verschaffa könnad, ihren Mischt wird allerdings dann im Ausland zum G’winn g‘macht. Des send eaba dia kloine Unterschiede.

Dau brauchad au dia Gewerkschaftsbosse gar net so schreia. Dia kassiarad au Millionagehälter dia überhaupt net zum rechtfertiga send. Aber nimm mal oim ebbes was er scho im Überfluss hat! Dau isch doch glatt jeder der Meinung dia dädat des Gehalt wirklich verdient verdeana. Des sollt man au mal auf da Prüfschtand schtella, dau hättad beschtimmt wieder a paar Arbeitlose a Arbad und ma dät ganz sich no Geld drbei schpara.

Ja dau sind ja unsre Politiker dann richtig unterbezahlt. Wenn ma denkt was dr Ackermann von dr Deutscha Bank verdeant und was er duat. Oder andre Vorschtänd, dia au net meahr wia Essa und Trinka könnad, halt in ma andra Schtil. Wia ka ma des rechtfertiga das der oine net so viel hat das er sei Familie ernähra ka und der andre, bloß weil er vielleicht schtudiert hat und a wenig nach oba g’radlad isch, im durchschnitt des 100 fache?

Apopo schtudiera. Des wird jetzt au wieder a Fall bloß für dia jenige dia a Geld hand. Dau ka bald a Arbeiterkind nemme mit halta, denn wer ka scho pro Semeschter so locker 500 Euro na blättra. Und so kriagt der Fuchs all no an längra Schwanz, denn wer nau net schtudiert hat, der wird au bald koi Arbad meahr finda.

Aber irgendwia muass ja so a Schpitzegehalt au finanzierbar sei, reiwirtschafta ka des beschtimmt koi Vorschtand und koi Manager, also wo solls her komma wenn net schteahla? Natürlich, dr Kloi wird g’molka drmit dr Groaß was zu fressa hat.