aus ra maus an elefant gmacht – dia rechtschreibreform!
es isch scho dr helle wahnsinn was bei uns für an aufwand trieba wird das mir alle richtig schreiba kennad. und bis ma dia heitig grad richtig schreibweise beherrscht gibt es beschtemmt scho bald wieder a nuia. wia guat das sich doch unser schwäbisch net verändra duat.
allso wia hand mir doch bloß dia letschte jauhr alles falsch gschrieba. glei so falsch das ma ganz gwieß a ganz minischterium drfür braucht hat und au no a haufa schteuergelder verbraucht hat. jetzt isch au klar warum mir auf oin schlag a paar arbeitslose abbaua hand könna. ma hat ja a ganza haufa nuie biacher drucka miassa. wo bei au scho wieder fescht schtad das dia au scho wieder zwoierloi ausdrück hand. im oina schtad a Wort kloi und zamma gschrieba und im andra usanander und groaß. was soll jetzt dau wieder richtig sei? wia das i doch schwäbisch schwätz und schreib.
deutsche schprache schwere schprache. wenn scho bei uns selber all hui a nuie rechtschreibung exischtiert, wia soll ma dann dau als ausländer eascht no drmit klar komma? aber wia guat das es doch computer geit, dia hand drfür ja exschtra au a software dia dau entwicklad worra sich. dia dau nau wieder recht schreiba ka. und des macht so a programm nau au no selber wenn ma’s richtig eigschtellt hat. dau send mir schwauba halt schparsam, mir brauchad koi reform, schwätzad wia uns dr schnabl gwachsa isch und schreibad wia mir schwätzad.
aber vielleicht isch es gar net um dia rechtschreibung ganga. vielleicht hand oifach a paar minischter und dia sekretäre von deane sammt mitarbeiter und inna grad nix zum doa ghett. könnt ja sei. aber vielleicht ja au sei das dia unsre kinder in dr schual oifach bloß allwei meahr fordra wend. übrigens geit es dia rechtschreibung ja erscht seit bismarck an dr regierung war. dr goethe und dr schiller hand no schreiba derfa wia se gwollt hand und hand sich glatt au austauscha könna...........
wia guat das ich schwäbisch ka!
3 Kommentare