Aufstieg und Fall

Was will denn heit in de Nachrichta seah und höra? D’Journalischta wissad es! Für des Positive, des in dr Welt passiert, dau hat ma grad a mal a paar Sätze übrig, doch wenn es spektakulär isch, dann kommt a groaßer Bericht und wird mit Pfeffer und Salz guat g’würzt. Und so wäscht a kloina Maus schnell zum Elefanta ra. Aber send mir alle uns doch mal ehrlich, wen mir net erschüttert sei über Horrormeldunga? Muass heit net überall Bluar fliaßa? Muass in jedem Krimi Gewalt sei? A Kommissar Keller isch nia mit dr Dienschtwaffe unterwegs g’wea, hat sich nia g’schlägert. Des Fernseh hat dia Macht und produziert mitunter Gewalt.

A Fuaßballer, ja a jeder Schportler wird vor dem Ereignis schon hochjubelt oder nunter bügelt. Dr Schportreporter woiß von vorn herein scho wiaviel Tore der Mann schiaß oder hält, welcha Zeit er braucht und das er Sieger wird. Und welch a Enttäuschung dann wenn’s anderscht lauft. Aber ma hat ja au schnell wieder an neua entdeckt. Und wehe ma hat Presse oder an Reporter net auf seiner Seite, dann gnad demjeniga Gott, denn scho schnell wia se oin nauf g’lobad hand, genauso schnell wird er wieder abg’schossa.

Tja und dann dia Aufhänger. BSE, Voglgrippe. Send des etwas Seucha dia es früher net geaba hat? Heit woiß ma ja viel mehr, und wenn dann a Dr. Prof. Sowieso kommt und eigentlich Entwarnung geaba will, wird des gar net akzeptiert. Stallpflicht und Massaschlächtunga, überbürokratisiert sind mir. Ma ka Blätter für Wocha fülla, wenn ma nix bessres hat und aus dr kloina Maus da Elefanta macha. Und Politik muass natürlich aufschpringa, denn endlich hand dia au mal was zum saga und könnad kommandiera, ja befehla. Anscheinend gibt es jetzt koi Voglgrippe meah, zwar isch dia Schtallpflicht no aktuell, dia glückliche Hühner schtocksauer wenn se des frische Gras erblickad nach deam langa Winter, aber ma liest nimmer viel dr’vo.
Bleibt an oim dia Fraug hänga, war es denn alles wirklich scho schlimm? Hätt’s dean ganza Zenober wirklich braucht? Aber jetzt kommt ja bald dia Fuaßball – WM und dau gibt es wieder gnua zum schreiba, dau hat ma nau für so Kloinigkeita koin Platz meah und ma hat Fuaßballer dia ma nauflupfa oder abschieaßa ka.