„Alle vor, noch ein Tor“

Fünfzig Mann, alle hockad se in dr erschta Reihe, voar em Fernseher, in dir Wirtschaft unter lauter Gleichgesinnte. Voar em Anpfiff wird no mal schnell über da Trainer herg’falla, was für a Scheißaufstellung der doch voarg’nomma hat. Und jeder von deane Fünfzig würd des natürlich anderscht mache. Ma woiß im Vorfeld scho, so ka ma des Schpiel doch gar nia g’winna. Dr einheitliche Tenor gegaüber em Trainer nau „der hat doch koi Ahnung von Fuaßball“!
Nau gad’s los, Anpfiff und dr Gegnermacht da Anschtoß. No isch ruhig im Lokal, aber dann kommt dr Gegner zweit auf’s Tor zua. „Mensch, deck doch, nimm deam doch dean Ball weg“ schreit dor oine. Dr andre, Schiri, siehsch de net, des war doch Abseits, Mensch, wo gucksch Du denn na“, kontra vom andra, „wo hasch denn du na guckt, dau war koi Abseits, du woisch doch grad das dr Ball rund isch“. Dann gad’s wieder zua auf’ eigne Tor. „Gang doch na, hol dean Ball, leg’n doch, hau dean Ball en’s Aus“. Dann dr Schuß, knapp am Tor vorbei, a rauna im Saal, „hand se meah an dusl g’hett. Abschlag vom Torwart. „Mensch, laufad doch, holad eich doch dean Ball und nau nix wia vurre“ heart ma aus dr Mitte raus. „Was send ihr denn für Schnecka“ sait a anderer, „duat der denn so lang umanand, der soll doch schiaßa“. „Gib doch ab, dau, siehsch net, dau schtad oiner frei“ wettrad glei a anderer nei. Und nau dr Schuß und „Toooor, Toooor, jawohl, so isch richtig“! Dann a Pfiff und es hoißt „Abseits“. Wo war denn dau Abseits, der Schiri hat doch sei Brilla vergessa, ja so a Lichtle lasst ma pfeifa, der hat doch koi Ahnung vom Fuaßball“.
„Dia schpielad heit meah an Schtiefl zamma, komm hear mer auf, und für des kriagad dia no a Geld, dia müsstad ja oins mitbringa“ schreit oiner von hinta raus. Dann fällt oiner von de Gegaschpieler, Pfiff und „Faul“! Des war doch gar nix, der hat sich doch bloß falla lau“ hoißt es em ganza Lokal. Dann dr Freischtoß. „Machad a g’scheita Mauer, Mensch, gand doch weiter na, passad auf, .............Schuß.........Tor“. Hat ja so komma müssa. Dia lahme Enta hand doch koin wert net. 1:0 für die Gegner, „so könnad mir des Schpiel nia g’winna, so wia de Unsre rum laufad, guck se doch a, isch gar koi Pfeffer net dau. In dr Halbzeit, dau wird nomal schnell diskutiert und d’Mannschaft nui auftoilt. Und a jeder moint „I hätt halt.........., nau dät des Schpiel ganz andersch laufa“!
Di zwoit Halbzeit, und scho gibt es wieder Beschwerde an da Trainer. „Ja warum hat er jetzt dean auf Bank nau g’setzt und dean rei g’holt, der hat doch glei gar koin wert, dean oine hätt er naus doa solla“. Des Schpiel lauft, Unsre hand da Ball und schtürmad vurre. „Kerle pass auf, Hintermann, schpiel ab, dau, rechts isch oiner frei......ach Kerle“. Jetzt hat dr Hintermann da Ball sich g’holt. „Wia ka ma so an Ball verliera, des hätt a Tor geaba müssa“ woiß oiner ganz sicher. Dia Zeit lauft, des Schpiel au, bloß net zur Zufriedenheit! „Was kickad dia denn umanand, dau schpielt ja unsra E-Jugend no besser wia dia“ sait oiner ganz zermürbt. Und dann dr Schlußpfpiff, 1:0 verlora!
„Wia Anfänger hand dia g’schielt, und dau will ma a WM g’winna, dia sollad doch hoim ganga“ sait oiner in dr erschta Reiha. Im Fernseh dann a Interview mit em Trainer „äh, ja, äh mwir hatten einen starken Gegner, äh, die hatten die besseren Chancen, äh, ja, äh, ich werde mit meinen Leuten reden äh, es ist dumm gelaufen äh, aber äh, beim nächsten Spiel äh, da werden wir äh, ja ich werde die Mannschaft äh, .........“! A rauna gad durch da Saal „so, wia will der so g’winna, der hat doch von Fuaßball koi Ahnung, also i dätt dau ...............“!
Na, wer woiß, vielleicht hand des dia Schpieler g’heart, und dr Trainer, und beim nächschta Schpiel machad se alles so wia es dia Fans wollad und für richtig haltad.........doch wia will ma dia Milliona Meinunga umsetza? Fescht steht auf alle Fäll, a jeder voar dem Fernseher und a jeder Zuschauer hat mehr Ahnung vom Fuaßball wia dia Fuaßballschtars, dia ihra Geld umsonscht verdiena deant.