Schulanfang!

September war's, vor viele viele Jaur - nämlich genau vor 34
(o heiligs Blechle, bin i alt gwora).

Aufgregt war i freilich anno 75, bloß des sieht mer auf dem Bildle net so. Da han i lacha solla, dass d's Mädle schee ausschaut.

D'Hoor hat mer mei Muadr eidreht -
wia dr Spatz von Avignon han i ausgseah, gell?

Ond des nette O-ziah-sach, a richtigs Girlie war i damals.

Dr Ranza war aus roata und gelbam Leader, des war no a g'scheits Material frieher. Bloß schwer war er (glaub i mi zum erinnra).

Ond riesig war dia Tüt, seahat ihr's alle? Fascht greaßer wia's ganze Mädle (und i moin, dia war au recht schwer)....
Was da alles dinna war.....Stift in alle Farba, Bleistift und Radiergummi, Spitzer und an haufa Siaßigkeita freilig au, was moinat ihr!
Aber i glaub, das dia untera Hälft ausgschtopft war mit Papier, des war quasi gfaket, wenn mer des so nenna will.

Betrug am Kinde!!

I woiß net, wia des de andere ganga isch...., aber i han mei Sach au doila miaßa, mit mei'm Bruader, der scho 4 Johr vorher eigschualt worra isch. Und i woiß nemme, ob i dau was kriagt han von dem damals.....

Ja ond in dera Klass, mit dera Lehrerin, ond dia ganze Mitschieler, des war freilig au alles nei und aufregend.
Ma hat sich ja glei beschnuppert und umguckt, was dia Konkurrenz so alles dabeihat (an Schualtieta).

Bloß was dia Andre denna ghätt hand, des woiß i heit nemme!
Isch eh scho gessa! Ond nach 34 Jauhr isch des ja au nemme so wichtig.

Ja ja, so war des damals, an mei'm erschta Schualtag.
Alt sammer worra, und ganz so schlank wia auf dem Bildle schau mer au nemme aus.
Aber isch ja klar.

Des Siaße lockt immer no!
Pfiats eich gell!