De Pangschenär

Dä Pangschenär

Biste noch jung un vuller Mucke, bien Rackern blifft nich weg de Spucke,
kannst swore Sachen lichte wuppen, wo keine stahet – Böhme utruppen,
möchst gern de Steerns von Hewen halen, dast mit din Purre mächtig prahlen,
rennst dulle, hille hen un her, bist du noch lang kein Pangschenär.

Hast du en Fruensminsche funnen, mit öhr dat Tartjen annefungen,
mosst balle noch vor Kinner sorgen, dat Utgift recket nur bet morgen,
schaffst dik en Hus un Auto an, un stahst ok süss noch dienen Mann,
un meinst nu biste endlich wer, ok datt gifft noch kein Pangschenär.

De Kinner sünd nu ok all grot, verdeint öhr eigen Geld un Brot,
du hast all Sülwerhochtiet hat, un bien Dienste biste wat,
bist im Verein dä erste Macker, feulst dik recht klauke, plietsch un wacker,
et is de längste Tiet all her, nu warste balle Pangschenär.

Un eines Dages ist sau wiet, bist Pangschenär, nu haste Tied,
kannst morgens betten länger slapen, doch rummelungern schöllste laten,
saun betten warken holt dik jung, dabie blifft ok dien Grips in Swung,
gast joggen ok bie slechten Weer, dafür bist du nu Pangschenär.

Du hörst noch nich taun olen Iesen, schasst allen noch din Können wiesen,
man brukt dik ok as Kinnermäken, schasst de Ostereier schön verstäken,
dä Dorpsverein kann dik nich missen, da is niks uppen Ruhekissen,
un bi dä ole Füerwehr, brukt man dik noch as Pangschenär.

De Tied vergaht du loppst da mit, ward ok all drömelich de Schritt,
kannst ok nich mehr sau hille denken, dat Fahrrad nich mehr grade lenken,
solange dik dat Eten smeckt, un morgens dik de Sunne weckt,
glöw immer dran, dat ward all wer, dat is nu so as Pangschenär.

Ja wenn du meinst nu biste old, dat Führ in dik ward langsam kold,
denn moste dik tauhoperieten, de Fuhlheit anne Siete smieten,
un warste morjens freu wer wach, nimm as Geschenk den nien Dag,
mit ....X..... kiekt mal her, het wieen SUPERPANGSCHENÄR.

X 82,91 oder 80 Jahrn Günther Jatzkowski 2004