As de Een heeten deit, so sücht de Anner ut ...

Gesellschaft

Is dat nich gediegen ….?

Een büld van de Minschen, de de Gloovensweetenschkupp studeert hevvt, un in de Bedrijf Kaark een betoalten Aarbeitsstää harn ov noch hevvt – sünners wenner see all ut een wat hoogeren Troch äten un drinken – lieden schiens gewaltich ünner Demenz. Dat Vergääten ov dat sükk nich besinnen köänen is in disse Krings villicht ok Vöörrutsetzung, üm överhaupts so een Stää intokriegen.
De Augsbörger Kaarkenkeerl Mixa kann sükk an de Minschen, de nu särgen, dat he hör in siene Tied as Schrobenhusener Staddpaster stilkens düchdich vergallert hett, nich mehr besinnen. De, de he domoals as Kinner vertobakt hett, de köänt dat säker ümso bäter. Dor kunn man nu joa särgen, dat is joa de katholsche Kant, un de Froolüü un Keerls in Ornat mit dat katholsch Firmenteeken up de Böst hevvt liekers joa heel anner Problemen.
Nu koummt oaber wat van Dach, dat düdelk moakt, dat bi de reformeerde, de evangeelsch Feldpostadress dat sülvige Leiden to kennen is.
Antje Vollmer – een grooten Noam in de bundsdüütsche Turnschoopartei. Van Huus ut Kaarkenfroo - dat heet Pastorin mit een Dokter vöör de Noam – de oaber mehr een Feebel vöör de Politik hett (ov is dat villicht blods, wiel dat in disse Job mehr Pinunsen givt?). De sitt joa nu een runnen Toafel vöör, de sükk mit de Schikksoalen van Heimkinners in Düütschland befoaten deit. In Volkes Updrach sotosärgen. Dat is joa sowiet ok aal heel moi un ehrenhaftich, wenn ... joa wenn dor nich de Soak mit de Breef van een Mester ut de Odenwaldschool wee, de disse Mester all in tweedusendtwee an de “Vizepräsidentin des Deutschen Bundestages, Frau Dr. Antje Vollmer” schreeven hett. In disse Breef beliekteekend he de Froo Vizepräsidentin Dr. Antje Vollmer all aal dat, aal de Schwienereen, de in disse Eliteschool nu reschkoapen van Dach koamen sünd. De Politikerin, Theologin, Pastorin Vollmer hett disse Mester lapidar dör een Schrieverswicht in hör Kantor antern loaten, dat he, de Mester, hör van een Soak un Doon berichten wüür, van de see, de Politikerin, de Theologin, de Pastorsche un see dat Wiev niks verstoahn wüür un doarüm dor ok niks to särgen kunn. Dat de sülvige Antje Vollmer nu de Heimkinnerschikksoalstoafel vöörsitt, dat dann begriepen well will – ikk kan dat nich.
Nu froach ikk mi, ov disse Vergääters un nich Besinners nich bäter up Jan Meyen ov Spitzbergen uphoaben ween – wenner see dor näämich wat vergääten, denn mooten see dat blods sülven utboaden.

ee