Die Deutschen sind zu Dick!!!!!

A Herzfaftes Essa, so wia ma sich es so ab und zua mal wünsche dät, so schlemma wia dia Reiche und Politiker, des könnad mir uns scho lang abschminka. Denn im wahrschten Sinne des Wortes muass sich dr oine oder andere da Gürtel scho a wenga enger schnalla. Na ja, und nur von Luft und Liebe leaba, des isch scho a ganz magra Koscht.

Aber Fazit isch, und wenn des Politik feschtschtellt, nau muass des wohl so sei, mir Deutsche send alle zu dick! Doch wenn i jetzt mal so um mi rum guck, mit wiaviel Leit i au zamma bin, meah wia 10 Prozent ka i net ausmacha wo i behaupta möchte, dia hättad a wenga meah auf de Rippa wia dr Normalbürger. Ob dr Herr Seehofer sich vielleicht für uns au mal auf d’Waage schtella dät und uns saga was dia anzoigt???

Es soll Menscha geaba, dia derfad bloß oi Schtück Rhabarberkuacha oder a Schtück von ma Gogolhupf a gucka und scho hand se a Pfund meah drauf. Es gibt aber au andre, dia könnad von jedem Schtück drei Essa und hand gar koi Problem dr’mit. Manche essad aus Fruscht, weil se dia Politik nimmer mit anseah könnad, andre aus Liebeskummer. Wäre es also naheliegend des alles abzumschaffa was Fruscht bereitet.

Dann soll es Leit geaba dia einfach dia Gene von dr Großeltra in sich hand und essa könnad was se wollad und net abnehma deant. Dann sind es wieder dia ganz extreme, weil’s modern isch, alle mögliche Abmagerungskura versuachad und dann an Magersucht leidat. Und so a Behandlung dann in dr Klinik isch au net grad billig. Aber wo isch jetzt dia Norm? Muass jetzt nau a Mensch mit ma 1,80 Meter genau 80 Kilo wiega, oiner mit ma 1,50 Meter, derf der net meah und net weaniger wia 50 Kilo wiega????

Aber isch es net a so, dass sich jeder Mensch, weil er ja eigentlich au a Gehirn mitkriagt hat, dr oine meahr, dr andre weaniger, genau woiß wann er sich guat und wann er sich schlecht fühlt? Kia net a jeder für sich selber entscheida welches G’wicht er mit sich rum traga möchte? Und wenn es so weiter gad dass dr Schtaat uns immer meahr an da Geldbeutel gad, nau könnad mir uns bald eh koin Rhabarber, - Kirsch – oder Gogolkuacha mahr leischta, von Wurscht und Fleisch ganz ab’seah!!!!