Scho des richtige Faschingskostüm ausgewählt????

Jedes Jauhr isch es a Plaug
Weil i mi all wieder fraug
Was zum Fasching In wohl isch.
Was liegt huier denn em Trend
Damit mi au meah koiner kennt
Und ganz Inkonido dau bisch!

Nau guck i mi halt mal so um
Was es geit so umadum,
wo mir au no schtanda kennt.
Cowboy, Indianer oder Pirat
Isch ebbes des oim allwei schtad
Und hau i au scho g’hett als Kend.

A Mensch vom Mars, a Aschtronaut
Isch heit zu Tag au no net out,
und au Scheich’s send all geara g’seah.
Vielleicht als Frau verkloidat gau?
Dät ohne Schnurrbart au guat schtau!
Doch de rechte Schuah zum Tanza duat’s net gea.

Als Tiger, Löwe, Bär, Leopart
Wär au a mal a andra Art,
wenn ma dau net so arg schwitza dät.
Woa wär’s mit Ritter oder Clown?
Vielleicht sogar als Pater Brown?
Als Adam, mei, dau wär alles d’schpät!

Doch wenn i all’z so überblick
Isch a scheaner Ma in allem chic
Und braucht nix b’sondres a zum hau.
So guck i in mein Kaschta nei
Und find au ebbes gar scho glei
Ebbes eifalla muass ma sich halt lau…..!!!!