Myheimat - Workshop

A Workshop bei myheimat,
was wed denn des bloß sei,
so denkt ma sich mal z’eascht
und bild’t sich gar nix ei.

„Schreiba lerna“ hoißt es dau,
als wenn ma des net kennt,
weil’s andre halt grad so deant
ma au dau na ma rennt.

Mit ma Schtrahla schtad mal scho
am Aufzug glei Chrischtine dau,
„so“, denkt ma sich weiter halt,
„ka ma sich empfanga lau“.

Dr Boris wartad im Büro
und isch scho ganz nerves,
nau kommt dr Mulle no dr’zua,
ma denkt sich, „was wed etz des?“

A frischer Kuacha am Fenschterbrett,
so gad des guat mal a,
und d’zua au lauter Leit
dia ma guat vertraga ka.

Herbert, Brigitte, d’Annemarie,
Diana, Gerlinde, d’Ursula,
dr Erich und dr’zua no i,
dau kasch nau nix meah saa.

d’Fraua, wia es halt so isch,
warad meah in dr Überzahl,
Doch als Ma nemmt ma des na,
denn so isch es halt a mal.

Jetzt soll der mal zoiga was der ka
hand vielleicht viele denkt,
doch wia nerves dr Boris nau au war,
d’Aufmerksamkeit hat ma’m g’schenkt.

Dann au glei an Computer na
nach der ganza Theorie,
„Über dean Workshop glei,
dau schreibad dr was hi“.

Mei hand dau dia Köpf glei g’raucht
dahoi dät alles andersch gau,
doch jeder hat was zema braucht
was ma au seah ka lau.

Und des nau glei ins Netz no nei,
des hand mir jetzt net so denkt,
doch ma sieht am End nau doch
was so a Workshop brengt.

Dahoi hätt ma’s ganz andersch g’macht
und wär vielleicht au schärfer g’wea,
aber ma woll da Boris ja net glei
am A’fang scho mit Träna seah.

Erkunda soll a Reporter all,
des hat ma uns ja g’lehrt,
so hand mir erkundat schnell
wo uns a Wirt begehrt.

Drei mal um da Block mal rum
nau war ma au scho dau,
dau wollt mer zwar z’eacht net na
aber s’Auto dät guat schtau.

Und so hand mir zu Dritt dann halt
dau oifach weiter g’macht,
dr Ober hat des so was g’freit
und hat uns all bloß a no g’lacht.

Jetzt woiß der au a mal
was denn myheimat isch,
des hat er no net kennt
dr’für glei von uns ganz frisch.

So war der Aubad rund um schea
und erfolgreich no dr’zua,
und Aubad für so Workshops,
ja dia däts gea no g’nua.........