Isch heit net s’ganze Jauhr Fasnacht???

Es isch no viel los, en dr Fasnacht, rings umher, doch nemme so wia es friaher mal war. Zwar hand dia traditionelle Faschingsgilda nach wia voar ihre Treffa und sorgad am Rosenmontag am Marktplatz für a riesige Schtimmung, aber dia Wucha dr’voar…..! Ma verzählt no viel und oft von deane Zeita wo dr Krumbacher Schtadtsaal alloi scho all Samsteg ausbuacht war. Dau war TSV – Ball, dr ADAC – Ball, Dr Flichtlengsball, dr Skiball, dr Metzgerball, und net z’letscht au no dr Rosenmontagsball. Letschtera hat es au noe m Mundingsaal gea. Aber au dr Pfarrball, dr Fuierwehrball, dr Musikerball und no andre meah. Dr’zua diverse Hausbäll und natürlich dia traditionelle Weißwurschtessa beim Falk und Baader bis nei en d’Friah, oft bis hell worra isch.

Was isch dau heit anderscht, außer der Zeit? Hand sich d’Leit au verändrad? Isch es weil heit doch des ganze Jauhr Fasnacht isch? Was muass ma heit bieta dass d’Leit na gand? Dau isch mal der Nostalgieball von dr Volksmusikberatung, ebbes andres, d’Leit kommad von Hundert Kilometer weit her. Nau isch no dr Senioraball em Schtadtsaal und des war’s mit deane Bäll dau dussa. Selbscht dr Nette- Leute -Ball hat nemme zoga und isch meah aufg’heart worra. Dr Gumpig Doschteg beim Diem isch no a Renner, ja und dr Rosenmontag am Marktplatz, je nach Witterung. ma wed seah was dr nuie Musikerball am Fasnachtsamsteg beim Munding des Jauhr brengt.

Es geit halt koine tanzfreie Zeita meah, Fasnacht isch’s ganze Jauhr und ma braucht nemme bloß d’Fasnacht zum Luschteg sei. Ob ma des Geld liaber heit fer an Skiurlaub her nemmt weil es ja heit dia Winterferien geit? Vielleicht send au emmer weaniger Leit dau dia Verantwortung und a Arbad übernemma wend, liaber bloß a’schaffa und feira deand. Bloß jemand muass halt au dia Organisation übernemma und alles herrichta. Vielleicht isch auf em Dorf dau oifach meah Zammahalt wia en ra Schtadt……….