Dia Qual mit der Wahl.....

Em März send s’Bayern Wahla
und mancher leidat Quala
ob er’s wohl wieder packt.
Und nau send dau au Nuie,
offene und au a weng Schuie
dia reisad im Schtundatackt.

Und nau isch no der Bürger,
wean er wählt von deane Würger
der eahn am längschta Leaba lad.
Dann send no dia Antiwähler
dia au warrad allwei hehler
und all’s am A...vorbei gad.

Ma kenn’ts de oine zoiga
und mit deane a weng foiga
dia nix auf d’Roih hand braucht.
De andre kennt ma a weng dupfa,
ja a wenga ärger schtupfa
das dau a mal richtig raucht.

Ma duat jetzt all’z probiera
und bloß nemme recht regiera
gar a ganzes halbe Jauhr.
Auf Wahlkämpf duat ma fahra
und des alles offabara
was hinterher gar nemme wauhr.

Honig um’s Maul rum schmiera,
alle andre bloß kritisiera,
des hat jetzt Priorität.
Die andre nieder macha
mit ganz banale Sacha
das glei alles d’schpät.

D’Schteara vom Himml raa liaga,
ma will viele Schtimma kriaga,
des isch alles no was zählt.
So wed dr Wähler ködrad,
moinad, mir send verblödat
und dass ma sia nau wähl!

Doch ma ka sich no so quäla,
wean willsch denn wirklich wähla?
Brau, Gelb, Roat, Schwarz, Grea?
Es wed sich au nix ändra,
des ka ma net verhindra,
weil Lumpa duat’s üb’rall gea!