Die Austrianer kommen.....

Was hat ma net scho über dia „Austrianer“ Witze g’rissa, an ganza Aubad lang hat ma drüber lacha könna über deren bescheidene Blödheit. „Warum ist die Österreichische Fahne Rot-Weiß-Rot? Damit sie sie nicht verkehrt aufhängen können“, mit solche und viele andre hat ma se für Dumm verkauft. Doch es soll Zeita gea, dia ändrad sich und so manches dumme Köpfle fangt zum Nauchdenka.

Arbeitslosigkeit und Lehrschtellamangel in Deutschland. Wenn’s dau nix gibt, dann vielleicht wo anderscht. Und so hat z.B. in Austria der Tourismus scho all a wenga boomt und Leit hat ma braucht. Und so isch es viele eig’falla, ma könnt ja au dau deana sei Geld verdeana. Und so hat inzwischa Österreich an scheana Anteil an deutsche Gaschtarbeit, und boide Seita, so heart ma, seiad sogar z’frieda.

Benzinpreisexplosion in Deutschland. In Austria all no a paar Cent billiger. Und dia Grenze zwischa Deutschland und Österreich isch net grad kurz, ja länger wia ma denkt hat. Und überall ganz Schtraußa num und überall im Grenzgebiet gibt es Tankschtella. Und so fährt scho a Rosenheimer nach Tirol zum Tanka und lasst dau seine Euro’s liega. Und wieder kassiert dr Österreicher von de Deutsche, also ka der gar net sooo blöd sei!

Mit dr Maut kassierad dia uns ja schon lang ab, dau hand se bei uns no gar net g’wisst was des Wort überhaupt zum bedeuta hat. Aber bei uns hat ma ja au d’Maut nui erfinda müssa. Dann isch au dia OTV oder so Mieralölg’sellschaft in Bayern groaß g’worda und hat Tankschtella eröffnad. A wenig billiger wia dia oine und wieder schöpft Austria da Rahm ab. So wia au beim Holzhandl. So kauft a Österreichischer Holzunternehmer zum a Spottpreis alles deutsche Holz von de Kommuna mit Feschtpreis und Vertrag auf Jahre auf. Und unsre Sägereia hand koi Holz meah und so weaniger Arbad.

Und jetzt sitzt dr Österreicher au in Haunschtetta und andre Schtädt drinna. Wenn Gerschthofa Beate Uhse hat, so hat Haunschtetta jetzt XXXL, und somit da zwoitgröschta Möbelhändler der Welt bei sich. Na ja, und des isch eaba a Österreicher. Und wieder kassiert Austria und inveschtiert bei uns, schaffad Arbeitsplätz und wieder isch der gar net so dumm wia man all nag’schtellt hat. Wer woiß, vielleicht kassiert der au no ganz Bayern z’ruck???
Woiß ma’s?