Des Nichtrauchergesetz oder Rauchergesetz?

Der Kriag zwischa Raucher und Nichtraucher isch längscht a Evergreen und g’heart zum täglicha Leaba dr’zua. A jeder fühlt sich eig’schränkt in seiner perönlicha Freiheit, a jeder fühlt sich im Recht. A jeder legt Zahla auf da Tisch dia em andra des Gegatoil beweisa sollad und irgendwann isch nau a richtig großer Schtaatsapparat dr’mit beschäftigt des gesetzlich zum regla.

Aber wia es bei unserm Schtaat so isch, alles was g’reglat werda soll isch letschtendlich ung’reglad. Dr goße Apparat hat an Haufa Geld verschluckt und was am Ende raus kommt isch eigentlich wieder a Abfallprodukt des wieder überarbeitet werda muass. Wenn so was oi mal passiert, nau druckt jeder Moischter mal a Aug zua, doch wenn der Abfall in Serie gad, jedes Produkt dia selbe Mängl aufweist, muass sich dr Moischter ebbes überlega, denn für an Abfall ka er net zahla weil er dean au net zahlt kriagt.

Anderscht beim Schtaat und seine Produkte. Dau wird von oba ra, von Berlin so a Rohling de Länder voar d’Fiaß g’schmissa, zu sagen, deant dr’mit was ihr wend. Und so hat nau jedes Land seine oigene Vorschtellunga wia des Endprodukt ausseah sollt. Doch richtig fertig zum Gebrauch isch es all no net. Also schmeißt ma des mangelhafte Produkt em nächschta drunter voar d’Fiaß, der des ganze nauchschaffa muass. Manches Toil isch so vermurkst, dau kasch’ bloß no wegschmeißa.

Was kommt jetzt raus mit deam Raucher - oder Nichtrauchergesetz? Welches Land macht welches Gesetz zu seinem? Wo derf in Zukunft g’raucht werda und wo net? Für was hat dr Schtaat eigentlich bisher dia schtändig g’schtiegene Tabakschteuer verwendet und wo nimmt er des Geld künftig her wenn des wirklich runter gad, so wia er es geara hätt?

Es hätt wohl scho sehr viel braucht wenn bloß Wirtshäuser, Gastschtätta, Restaurants und Bars von außa sichtbar ihra Schtätte mit ma großa „R“ oder „NR“ kennzeichna hättad müssa. nau wär es jedem Gascht, ob Raucher oder Nichtraucher selber überlassa blieba wo er na gad. Aber des wär ja zu oifach g’wea, des hätt ma ja in a paar Schtund scho verabschieda könna, bloß was kompliziert isch und koiner recht verschtad, des isch guat. Und ma muass ja zoiga das ma in ra politischa Macht sitzt und wia schwer dia Diäta zum verdeana sind.

Wia groß dia Schlupflöcher bleibad, des wird man schpätestens dann seah, wenn des Gesetz in Kraft tritt, denn bis dau na schwimmt no viel Wasser da Lech oder Kammel nunter und letschtendlich warrad wieder so viel politische Größen g’schmiert, von dr Tabakindustrie, das am Ende des raus kommt, das jeder Wirt fer sich alles entscheida ka. Hauptsach war und isch das a großer Apparat erscht mal zum laufa komma isch, obwohl ma g’wißt hat welcher Scheiß hinta raus kommt.........