Als Soldat mit 50 alt.....

Endlich isch dia Rentadebatte vom Tisch und ma woiß inzwischa dass es nur gerecht isch und Schtaat, Rentakasse und Wirtschaft nur förderlich isch wenn ma bis 67 schaffa muass. Ma hat ja lang gnua Zeit g’hett um es klar zum erkenna, wia rüschtig und guat beinander Männer und Fraua sind, dia ihra Leaba lang bloß a bissle Schtoiner, Mörtlkübl und Grüschter g’schleppt hand. Und zum Toil hand se eh bloß zwischa 35 und 38 Schtunda in dr Wuch g’schaffad. Und am Wochenende hand se au gnua Zeit g’hett sich zum erhola. Also, fit bist 67.....

Wenn ma aber solche Soldata a guckt, dia ihran Kopf ja für des deutsche Vaterland na heba hand müssa, koine freie Tag g’hett hand. Wenn ma sieht das dia sich Tag und Nacht mit em Frieda en unserm Land Gedanka macha hand müssa. Wenn ma bedenkt, das grad was au dia Ausbildung betrifft, grad dia Dienschtgrade mit 50 scho total ausg’laugt send und am Krückschtock dr’her kommad. Ja wenn ma des alles zamma zählt, nau muass ma verschtanda das dia koin Tag länger schaffa könnad.

Und ma sieht au glei no an zwoita positiva Aspekt: Ma muass dia jung Generation fördra und nau rucka lassa!
Wer will denn scho ewig bloß Feldwebl sei? Und isch des net für so an junga Kerl net schlimm wia er a gucka muass wia sie Chef scho nimmer ka, sich grad no am Schreibtisch feschthält um net vom Schtuahl zum falla und er ka net en Pension ganga? Dr’bei hätt er ja des ganze Zeig dr’zua sei Arbad no besser und viel motivierter zum macha. Ja und wer will denn net aufschteiga und a bissle meahr verdiena? Und a jeder Unteroffizier vergönnt sei’m Ober oder General doch geara dass er no ebbes von seiner Pension hat. Und selbschtverschtändlich au sei Arbeitgeber, dr Schtaat, will eahn für sei Arbad wenigschtens frühzeitig belohna könna.

Ganz andersch sieht des beim normala Arbeiter aus. Was dät der denn wenn ma eahn früher in Rente komma lassa dät? Und sei Erfahrung, dia er hat, dia brengt doch koi junger auf Bah. Und voar allem, en dr freia Wirtschaft gibt es ja eh koine junge dia nauchrucka könntad. Und bevoar dann so a rüschtiger Rentner au noch sich an Neabajob suacha dät um neabaher a Geld, vielleicht au no schwarz, verdeana könnt, soll der doch glei länger schaffa und ka dr’mit au ebbes für d’Rentakassa doa.

Beim Soldata schpielt des eh koi Roll, weil der hat ja eh nix nei zahlt und sei Arbeit bringt em Endeffekt ja eh nix in Kassa, dau isch es scho beim Normalarbeiter andersch. Dau isch a Kuah dia ma no mal kräftig melka ka, was beim Soldata koin Sinn macht, weil der koi Mill net gibt, dau ka ma ziah wia ma will. Ja, ja, so blöd send unsre Politiker doch net!

Im Nachhinein hätt ich doch au zur Bundeswehr ganga solla, mit verpflichta lassa solla, dann könnt ich jetzt in Rente ganga und dät a fürschtlicha Pension kriaga. Aber wahrscheinlich hätt i dann nix meahr dr’vo, weil i dann au mit em Krückschtock und total ausg’laugt dr’her komma dät...............