Wenn ma von dr Tracht schwätzt......

Für viele schtellt sich all meahr dia Fraug: Was isch a Tracht und was g’heart dr’zua? Weil ma ja em Allgäu a andres Häs anzieaht als em Rieser Kessl, ka a Tracht überall anderscht ausseah. Und dia Trachtavielfalt hat ma em Landauer Haus, beim Trachtamarkt wieder mal deutlich seah könna. Von überall her send se komma, dia Aussteller, 30 an dr Zahl, und hand alles rund rum, samt ihre alte Technika präsentiert.

Was ma unter so ra Tracht trägt, des hat Claudia Prommersberger-Fischer aus Krumbach zoigad. Lang scho send des koine „Bumphosa“ meahr. D‘ Hintermair Barbara, dr Schaber, dr Nägele oder Bührle Eva-Maria warad dann mit deam „Häs“ dau, des ma über deane ganze „Schpitza“ dann a hat. Und wer ebbes aus Leader will, a scheane Hirschleaderna, der war beim Aigner sei’m Schtand guat aufg’hoba. Zum Selbermacha hat es Schtoffe grad gnua au zum seah und anfassa gea. Und wer’s no net ka aber geara doa dät, der ka sich in oine von deane viele Kurse im Landauer Haus anmelda und sich unter www.kleidungskultur.de informiera.

Was ma doch net alles aus Haaren macha ka, des verwundert oin doch allwei meahr. D’Senser Doris und d’Rampp Uschi aus Krumbach und Billahausa hand dia Technik lang scho hussa und ihre Kloschter – und Haararbeiten und wia ma des Zuig macht, des zoigad se jedes Jauhr wieder am Trachtamarkt in Krumbach. Aber au wia ma richtig Schpinna duat und was ma aus deaner Woll alles macha ka, Technik vom Schtoffdruck, d’Weißschtickerei, s’Klöppla, und, und , und hat wieder viel Besucher ins Landauer Haus g‘lockt. A Vorführung historischer Frisura am Sonntagnachmittag und was ma doch jnet alles macha ka, zu deam sind extra zwoi Friseur aus Nürnberg nach Krumbach komma.

A Reißer war au wieder mal dia Trachtabörse. A Tracht dia halt mal nimmer passt ka ma dau guat an da Mann, an d’Frau bringa. Und des Angebot isch rege ang’nomma worra. Ja, es war wieder richtig ebbes los en Krumbach’s Hürba, beim inzwischa scho 8. Schwäbischa Trachtamarkt im und ums Landauer Haus. So das sich glei au des Fernseha interessiert hat und in dr Abendschau an Beitrag g’sendat hat, und im Kulturschaufenster von Werner Flott, immer am letschta Donnerschtag im Monat, werrad au nomal Ausschnitte zoigad. Und so wir’s au am zwoita Oktoberwochenende 2007 wieder so an Trachtamarkt geaba, wo sich viele Ausschteller glei wieder ang’meldat hand.