Wenn ma en Urlaub fährt

Wenn ma en Urlaub fährt
Wird ma gar oft belehrt
Wia’s Autofahra gad,
Wer wean fahra lad.

Kaum auf dr Autobah
Gad’s scho glei au a,
weil der dr neaba sitzt
scho zerscht mal schwitzt.

„Jetzt pass doch dau mal auf,
fährsch deam ja hinta drauf,
schalt dei Liacht doch ei
und dua da Blinker rei.

Ja hasch des net g’seah,
bald hätt’s an Unfall gea,
du bisch halt generell
ganz oifach d’schnell.

Ja gang doch mal vom Gas,
guck, dia Schtrauß isch naass,
kennsch Aquaplaning net,
mir kommad net d’schpät.“

So gad’s Kilometer weit,
hinta des Kind scho schreit,
weil es auf’s Klo doch muass,
zwickt scho zamm da Fuaß.

„Ja hearsch des Kind dau net,
wenn ma no Windla hätt,
komm fahr halt zua,
schlaufa kasch no g’nua.

Ja was isch heit denn los,
überhol halt mal bloß,
des hält ja koiner aus,
komm, guck und fahr raus.

Ja hasch denn des net g’seah,
dau wär a Raschtplatz g’wea,
jetzt sind mer scho vorbei,
mit der Überholarei“.

Und anu gad sia auf’s Gas,
er wed scho schier glei blaß,
fährt die nächscht Ausfahrt naus
und schteigt oifach aus.

„ja was duasch du jetzt dau,
fährsch ja grad wia a Sau,
was soll denn jetzt jetzt sei,
komm schteig meah ei“.

„Noi, denn weiter fährsch jetzt du
und zwar jetzt glei em nu
weil i ja net fahra ka
und jetzt au nimmer ma“!

Bevoar ma weiter fährt
Grinst er no erscht recht g’schert,
und setzt da Blinker glei,
fährt in d’Schtrauß nei.

Erscht a Hupa und dann quitschst,
wia er all no so trickst,
es duat an riesa Krach dann so
dann sind’s im Graba scho.

Des Auto Mauskaputt und Schrott,
Koi Ton, der jetzt komma sott,
Dia Urlaubsfahrt, oh Graus
Isch dau ha jetzt aus.

Und dia Moral von deaner G’schicht,
dr Fahrgascht, der schwätzt nicht
im Fahrer immer und allwei drei,
denn des holt oin moischtens ei……..