Wenn Bürokratie den eigenen Gesetze im Weg ist.....

Rechercha warum und wieso jetzt jemand politisches Asyl beantragt braucht ma net. Denn unsre Bürokratahengscht sind in dr Lage alles ganz genau zum beurteila. Und dia ganze Beurteilunga hand uns schon Milliarda Schteuergelder koscht, Unmenga von Verbrecher ins Land glau und viele sehr leicht g’macht da deutscha Schtaat zum ruiniera. Ma denk bloß mal z’ruck an dia Visa-Affäre mit Fischer und Co. Diplomatisches Denka ka ma net verlanga, grad wia so weanig an gerechta Weag zum finda. Denn für so was sind dia ja weder dau no ausbildat. Gehorchsamkeit den Gesetzen wird verlangt......

Doch wia viele Löcher unsre Gesetze au hand, Es wird sich koiner bemüha dia mal zum schtopfa. A jedes Gesetz und a jeda Reform dia in de letschte Jauhr auf uns zua komma isch war und isch a Flickwerk. Und so kommt es halt voar das ma verschpricht a Märchen wahr werra zum lau und gleichzeitig wird es mit anderen G’setzen zum Alptraum. Wia oft und wia viele des schon passiert isch, des woiß wohl koiner so richtig, doch wenn es ra Kleinschtadt wia Krumbach, wo fascht jeder jeden kennt, passiert, macht es scho betroffa. Betroffa au, weil bei der Natallia 150 Euro an riesiges Problem gibt. Des oine G’setzt sait, sia derf des nur für Schulzwecke nutza, sich dr’vo net a mal in dr Pause an Snack kaufa. Doch dau tritt jetzt au a andres G’setz in Kraft, des sait, wenn der Mensch 150 Euro bekommt, egal wo her und zu welchem Zweck, dann müssad natürlich andre Mittel kürzt werra. So hoißt es auf guat Deutsch: mit deam Stipendiumgeld von 150 Euro muass se vom Lerna und von de Lehrmittel runter beißa damit se net verhungrad, hoiza damit se net verfriert, sich damit a Dach über da Kopf baua damit se net im freia übernachta muass!

Des soll mal oiner von deane vormacha wia des ganga soll. Und jetzt isch des Mädle aus Weißrussland ja net auf dr Brennsupp dr’her g’schwomma und hat sich als Ausländerkind sich zur Beschta im Gymi g’macht, und des in kürzeschter Zeit. Aber sia isch mit ihrem Vater a Asylantaflüchtling ohne Grund, wia ma des so darschtellt. Und somit hätt se gar koi Recht auf a Stipendium g’hett. Es gäb dau ganz klare Vorgaba, hoißt es. Wo isch jetzt g’schlaufa worra? Unser demokratisches, soziales und christliches Deutschland, isch es neidisch das so a junges Mädle aus Weißrussland so g’scheit isch? Wiaviel Stipendien hat ma scho vergeaba ob’s braucht hat oder net? Vielleicht bloß weil dau a bissle Vitamin B im Schpiel war?

Wia Sinnvoll unsre Politik, Regierung und Gesetze wirklich sind, dau han mer mal wieder des beschte Beischpiel dr’für. Ma hat für alles Milliona und Milliarda, vor allem um se ins Ausland zum schaffa. Ma schickt Soldata zu de Taliban, in da Kongo, 250 Milliona sind dau a Pappaschtiel. Aber an deane 150 Euro im Monat, dau regt ma sich auf. Des Geld macht jeder kloine Beamte am Tag in irgend so ra unnütza Verwaltung kaputt. Und dia Bürokratie und der Arbeitsaufwand um d’Natallia und ihren Vater koscht meahr als um des es in Wirklichkeit gad.

Dau will des Mädle mit ihrem Wissa, ihrem Abi, des se in Krumbach macha möcht, dr Schtadt und im Land treu bleiba und es dau umsetza, nau wirft ma ihr solche Prügl zwischa d’Fiaß. Des G’schoi und des G’schätz um a bessre Bildung kasch de Hasa gea. Denn a Kind und oder Jugendlicher ka heit no so g’scheit sei, wenn koi Geld mitbringa duasch kasch au net schtudiera. Isch es dau a Wunder, bei solch ra absolut falscha Politik das es in Deutschland, von Bayern und Schwaben ganz zum Schweiga, koine wirkliche Kapazitäta meahr gibt, wenn ma’s scho im Keim erschtickt?

Vielleicht soll sich jetzt a mal zoiga welche Regionalpolitiker an Handlungsbedarf sehand. Ob so a Politiker sich au für ebbes einsetza ka au wenn es ganz oba net so populär isch? Aber vielleicht könnt er sich dau dr’von au sei Charakterimage aufbessra und als Wohltätig gelta und a positiva Presse ernta? Vielleicht soll ma leera G’schwätz über sozial und chrischtlich au mal daraus Tata folga?????