Verteidigung isch mehr wert als die Familie

Ma muass isch des mal glatt voarschtella, ma isch Dankbar seit 60 Jauhr koin Kriag, Frieda bei uns. Aus deam Grund hat ma ja au alles was mit dr Bundeswehr zum doa hat reduziert, Kaserna dicht g’macht, Leit abzoga und Regiona g’schwächt. Memmingerberg, Leipheim und Günzburg sind oifach weg komma. Aber es sind immer no fascht 30 Milliarda Euro, des sind 60 Milliarda Mark, dia ma in dr Verteidigung verpulvrad.

Wenn ma dann aber unsre Soldata irgendwo in dr Welt findt, Ob im Irak, ob im Kongo, ob sonscht irgendwo, derf ma sich vielleicht dann scho mal ebbes frauga. Wenn nau bei uns a mal was wär hätt ma koi Verteidigung, dia uns zwar jed’s Jauhr fascht 30 Milliarda koscht, aber im Ausland tätig isch. Wenn dr Ami Soldata oder Geld braucht für irgend oin Kriag, nau isch unsra Regierung die erscht wo hier schreit und so viel wia möglich nauch trägt.

Ja der Bush, der scheinheilige Friedensaposchtel. Der, der macht doch bloß Kriag um sei Wirtschaft auf Vordermann zum halta und mir blöde Deutsche unterschtützad des au no finanziell, hau, noi, hau dent mir nix dr’vo. Der macht mit seine Kriegsschpiel alles kaputt und mir schpendad freiwillig fer da Wiederaufbau. I muass es no mal saga, schreiba, was der Ami scho alles ang’richt hat, dau isch unser verlorene 2. Weltkriag ja a klacks gwea. Der schpielt sich überall als der Friedensschtifter auf, und was der scho Menschaleaba auf em G’wissa hat, normal g’heart der grad a so eig’schperrt wia viele von seiner Rambos au. Aber deane hält ma d’Schtange und uns lasst ma nach 60 Jauhr all no büßa.

Ja wenn ma des alles so verfolgt, dia Zahlawirtschaft in Berlin, wer was dia doch alles Geld hand. Was ma mit 1,5 Billiona Schulda dia Jährlich 40 Milliarda Zinsa koschtad, was ma sich dau alles leichta ka. Ma ka wo es au immer isch und wer es isch, im Ausland, mir sind die erschte dia des Geld na tragad, schenkad und schpendad. Bloß damit ma guat a’geseah isch. Im Land Pfui und nach draußa Hui. Mir bauad die ganz Welt auf, unterschtützad die ganz Welt, ob’s braucht oder net, doch für de oigene hat unsra Regierung koi Geld. Für Familie und Bildung zum Beischpiel. Für unsre Rentner, dia kassiert ma dopplt und dreifach ab. Uns saugt ma aus bis zum letschta damit dia Regierungsmitglieder im Ausland uns bewundrad.

Das aber des ganze Ausland uns auslacht, uns ausnützt, auf unsre Koschta leabt und Kriag führt, des will ma net seah, au wenn des no so offensichtlich isch. Dia blöde Deutsche, dia zahlad scho. Ob Merkl, Schröder oder Kohl, alle hand se unser Geld naus traga, Bewunderung und Ansehen erkauft, Dät ma a bissale meahr auf des oigene Land gucka, so wia es eigentlich richtig wär, dann dädat mir heit no guat dau schtanda. Dia hand es aber all no net begriffa, mit deam Groaßdoa isch’s vorbei, und was i net hau, des ka i au net verschenka. Aber nach deam des Volk deane eh egal isch, braucht ma sich au m Familie, Kultur und Bildung net groaß kümmra, denn des Zuig, des brengad ja alle Zuawanderer mit, warum also bei uns dau ebbes doa?