Send mir wirklich Jammerlappa?

Theoretisch dät au d’Merkl wissa wia ma an Aufschwung her bringa könnt. Doch praktisch, dau ziaht halt dia Wirtschaft und dia viel angepriesene EU net mit. Dia Milliona Arbeitslose, dia mir hand, statistisch ka ma dia Zahla all meah a bissle frisiera, so dass se scheaner ausseahnd. Doch Fakt sich, dass alles was ma bisher probiert hat in d’Hosa ganga isch und anschtatt weaniger meah Geld koscht hat.
Nach em Kriag, dau hand d’Leit g’wisst für was se schaffad und schparad. Sia hand g’wisst, sia dants für sich, heit isch des andersch. Heit ka a kloiner Arbeiter schaffa wia er will, er ka zu nix komma weil ja dr Vater Schtaat scho meah d’Hand aufhält. Und ma muass au zua gea, mit em Euro hand andre au no ganz schea na g’langad, bloß dr Loah und s’Gehalt isch halbiert worra. Sicher gad es uns no guat, an ma beschtemmta Toil. Ma schparad halt, grad dia ältere Leit, dia unsra Bundesrepublik a mal aufbaut hand, heit arme Rentner send. Dia kommad em Monat au mal mit 300 Euro aus, weil dia des schpara g’lernt hand. Aber dia trauad sich net auf’s Sozialamt zum ganga und um a paar Euro Zuschuß bettla.
Mir, dia a Arbad hand, noi, mir kennad net jammra, s’Geld gad mit em Letchta vom Monat auf, und was mir mal an Rente kriagad, des wird a Überraschungsei. Z’weanig dia nei zahlad und z’viel dia ebbes raus hollad. A System des halt net funktioniera ka. Aber wo kriagt ma dia Leit her, g’weiß net mit dr Globalisierung, denn was ens Ausland gad, egal wo na, des bleibt dau au. Und wenn de Groaße und ma en dr Politik net so verschwenderisch mit em Geld umganga dät, dät jeder am selba Schtrang ziah. Aber so isch halt des oinzige G’schäft des immer mehr floriert d’Schwarzarbeit. Und des Geld kommt net auf Bank! Wobei, wrum soll sich fr Kloine schäme, de Groaße und grad Politiker machads doch voar!