Schwätza ohne wirklich ebbes zum saga.......

Es geit Leit, dia kennad es oifach, Schwätza! Deane ka ma, wenn es sei muass, Schtundalang zua heara. Dau kommt ebbes rom dia Hand ebbes en ihrer Schtimme und sia hand a Ausschtrahlung. Und egal wia lang so a Moderation oder Rede, a Grußwort au sei ma, sia hand ebbes g’sait wo dr Zuhörer versunka isch und ebbes mit Hoim nemmt.

Es geit Leit, dia schtandat auf dr Bühne und wenn se an’s Mikro gand, nau gad scho a Rauna durch d’Roiha, „net scho wieder“ hoißt es bloß und a Toil schtad auf und gad auf’s WC, ober er grad muass oder net. Dia Leit hand zwar nix zum saga, aber sia moinad des und hüllad sich in ihra Selbstdarstellung. Und wenn 1000 sagad das es a Käs war, was und wia er es g’sait hat, isch er all no von seiner Qualität als Redner und Moderator überzeugt.

Das ma es von dr Politik kennt, des isch scho lang nix nuies meahr. Denn in Wirklichkeit will ma de Leit ja koi Information geaba, weil ma ja selber auch nix woiß. Also schwätzt ma halt um da Brei rom, d’Hauptsach isch, es isch ebbes g’sait. Ob der jetzt drei Sätz schwätzt oder zwoi Schtunda lang, ma woiß hinterher so viel wia am Anfang: nämlich nix.
Dau schpielt es au koi Rolla ob so oiner oder oina a netta Schtimm hat oder net.

Oine hat dia Begabung da schlechteschta Witz so zum verzähla das der sogar no guat wird und ma drüber lacha ka. Ja, dia kennad verzähla was se wollad, es isch Musik in de Ohra und a jeder horcht geara zua. Ma kennt es von viele Schtimmungsabende in Feschtzelter. Hochkarätige Kapella, Bands, wia ma heit sait, schtellad ihren Schtpitzamann oder Frau an’s Mikro und land dia moderiera. Sia wissad um des Gehör dr Zuschauer oifach Bescheid.

Und nau geit es so Selbschternannte Ansager, Moderator ka ma dau scho nimmer saga. Sia moinad wia luschtig des isch was se zu Gehör bringad und merkad gar net das koiner zuahört. Des send dia, dia eigentlich auf ma Schtimmungsabend, und net bloß dau nervad. Wenn se glei nix saga dädat hättad se meahr g’sait wia des was se schwätzad.
Aber vielleicht hand dia dahoi nix zum saga und miassad des wo anderscht los werra. Dr’bei solltad dia sich mal filma lau und sich selber heara, um zum wissa was se doch fer a schlechtes Bild abgeabad. Aber dia send so Selbschtbewusst das se sogar no glaubad ebbes g’sait zum hau, au wenn se nix g’sait hand und jedes Schwätza umsonscht isch und war..............
Dau kommt dann au des Kompliment her „Du bisch a alter Schwätzer“ oder „Der alte Schwätzer“! Des sait ma nau net umasoscht, oder????