Schpenda und wo gand se na.....

Schpendakonto am laufenda Band. All meah a Nuia für irgend ebbes, schtändig liegad Briaf im Briafkaschta wo ma ebbes na überweisa soll. Doch wia viel von deane Schpendagelder kommad wirklich a? Wiaviel bereichrad sich dra? Soll bei so oiner Aktion net alles auf freiwilliger Basis schtattfinda? Des dät au nau hoißa das wirklich a jeder Cent dau na kommt wo er soll. Dau sollt koi Verwaltung drzwischa schtau und d’Hälfte verschlucka.

Ma isch ja Hilfsbereit ohne Ende. Grad dia jenige, dia fascht selber nix hand, dia geand no meahr wia dia, dia’s em Überfluss hättad. Aber so isch’s halt, von de Reiche ka ma s’schpara lerna. Ma möchte sich scho frauga was a Schpendaktion mit Nächstenliebe, Menschlichkeit, Liebe zum doa hat wenn dr Organisator, wer es au immer isch, erscht mal Unkoschta abziah muass bevoar er es weiter überweisa ka.

Das so a Aktion au anderscht laufa ka, des ka ma jetzt wieder leasa, seah und heara. Und dia Bereitschaft isch enorm, denn ma woiß ja für was alles benutzt wird und wo es na gad. Dau werrad koine Unkoschta für LKW, für Kraftschtoff und fer Personal abzoga. Dau kommad koine Telefongebühra und andre Ausgabe zuschtande. Dia Schpendaaktion vom Miller Karre und seine Leit isch ehrlich, menschlich und wird voller Überzeugung durchzoga.

Dr Miller Karre aus Ziemetshausa, oiner der no da Glauba net verloara hat und als Wallfahrer a andächtiger Mensch isch, hat es zu ebbes braucht. Er isch a Beweis da für das ma mit Menschlichkeit, Fleiß, em Glauba und dr Nächstenliebe au ebbes schaffa ka. Er hat dia Kraft fer sei Schaffa kriagt, net weil er Rücksichtslos drauf los gad, net mit em Ellabogasystem. Und her hat all no Zeit ebbes guates zum doa ohne an da Profit zum denka.
Isch es so oiner net mehr wert an Friedensnobelpreis zum kriaga oder a andra hoha Auszeichnung als oiner der bezahlt delegiert?