Polizeidirektion ade wird’s bald hoißa......

Ma braucht bloß mal Zeitung aufmacha und da Polizeireport leasa, so ka ma scho erahna wia des nach dr Polizeireform im Lande ausseha wird. Zeitunga könnad sich freua, denn dann wird was des anbelangt alles a ganza Seite fülla. D’Sicherheit vom Bürger, vom Wähler, dia isch doch nix meahr wert. Au wenn ma nach Bombadrohunga und Attentate no so schea rum schwätzt, zwecks deam hand se lang no net begriffa worum es eigentlich wirklich gad. Ma muass nix schea und nix schlecht schwätza, aber a Tatsache isch es nu mal das Schtraftata zua nemma denad. A Tatsache isch es, ohne a Rassischt zum sei, das seit dr Oschta auf isch viel meahr duad als vorher. Au wenn es von oba ra net so g’seah werda will, aber des isch eaba dia politische Sicht, dia mit dr Realität oifach nix zum doa hat.

Wenn dia Polizeireform vom Innaminischterium wirklich zum greifa kommt, dann gad des schwer auf Koschta dr Sicherheit. Ma fühlt sich heit richtig aufg’hoba im Schoß unserer Polizei. Ma woiß wenn ma dia 110 wählt isch schnelle Hilfe dau. So hat ma’s ja mal g’wollt, hat allwei g’sait das Bürgernähe wichtig isch. Aber inzwischa gibt es au scho wieder Unterschiede, denn um an Politiker zum bewacha, woher er au immer kommt und was er isch, ka dia Sicherheit gar net g’nua koschta. Doch wenn’s um Herr und Frau Normalbürger mit Familie gad, dau ka ma ja reduziera. Und dann kommt es so weit das jeder zwoite dahoi an Revolver hat und sich selber beschützta muass. Dann machad schwarze Sheriffs wieder Karriere. Isch des dr Sinn von so ra Reform?

Vandalismus isch bald überall an dr Tagesordnung. Einbrüch in kloine Häuser bloß das ma a paar Hundert Euro hat. Gewaltverbrecha sind nimmer bloß in de Großschtädt dahoi, Beläschtigunga und Mißhandlunga schtandad au bei uns all meahr in dr Zeitung. Dia Reformer deant grad a so als ob bei uns auf em Land gar nix passiera würd. Dia deant grad a so als ob Krumbacher Polizei bloß Däumla dreha dät. Müssad mir uns scho bald im Wilda Weschta seah, wo jeder sein Revolver am Halfter trägt, zur Selbschtverteidigung?

A jeder woiß was er an unsrer Polizei hat und schätza muass. Ihra Präsenz isch unverzichtbar, net bloß wenn a hohes Vieh g’schützt werra muass. Und Gewerkschaftler dr Poizei hand recht, mit deaner Reform lauft dann koiner meahr Streife, und mancher Bürger muass um sei Hab und Guat Angst hau, und der Vandalismus wird gravierend zua nemma, des isch garantiert. Aber wia all sait dr Deutsche, „Dia deant so was se wend“ und gibt sich dr’mit wieder z’frieda und schimpft am Stammtisch und im Kämmerle weiter. De Krumbacher wird oi Toil nach em andra g’nomma, ma zuckt mit dr Achsl und heilad voar sich na. Denn was dia Polizeireform nach außa eischpart, in Wiklichkeit koscht se nämlich meahr als se bringt, des kommt auf dia Schtädt und Kommuna an Meahrkoschta zua. Denn dann wird von deane Halbstarke in aller Ruhe no meahr demoliert als wia heit scho.

Als Hüter des Gesetzes, wia ma Polizei au nennt, hat se dia Aufgab Schada und Unheil zum verhüte, und erscht dau sei wenn’s scho d’schpät isch, denn des hilft nau wirklich koi’m meahr. So wär es scho au dia Aufgabe dr Schtädte und Kommuna dr’für zum sorga das ma dean Unfug mit der Polizeireform unterbindad oder, wia in frühere Jauhr, wieder a Orts - und Schtadtpolizei einführt. Des verursacht natürlich wieder Koschta. Aber vielleicht könntad dia sich au a mal auf d’Hinterfiaß schtella und von oba ra net alles mit sich macha lassa.

Vielleicht sollt a jeder für sei Sicherheit ebbes doa und gega dia Polizeireform, gega unsra Sicherheit auf em Land dia Polizeigewerkschaft mit ma Volksbegehra unterschtüza? Vielleicht sollt ma mal deane in Müncha und Berlin zoiga das ma mit uns net alles macha ka? Sollt ma dia net mal wissa lau das mir alle mündig send und uns von oba ra net allwei nui diktiera muass? S’dät viel zum doa gea, ma müsst es bloß a mal a’packa, zur oigena Sicherheit, und des ollt uns des scho wert sei.
Oder vielleicht doch net?