Naturschutz gad net alle ebbes a.....oder doch?

A halbes Dorf schtad Kopf, ka sich bei Oscht – oder Weschtwind draußa net aufhalta, und Fenschter aufmacha, nau dät ma em oigena Haus verschticka. Zum Burges ganga, des hat so viel wert wia an d’Wand na g’schwätzt. Des Landratsamt, ja des g’schieht ja unter deam sein’m Deckmantl. Und wenn der Nama von deam zur Schprache kommt, nau isch au scho alles g’schwätzt, ohne zum reagiera.

Schuld an deam G’schtank isch a Bioabfallanlage mit Biogasanlage und no so a Neabaanlage. Draußa, 300 Meter vom Dorf weg, über dr Bundesschtrauß drüba a groaßes Areal wo Biomüll ang’fahra wird. Drneaba dra glei die Biogasanlage, alles gibt G’schmäckla ab dia alles andre bloß net duftad. Aber des schtört ja weanig, isch ja alles zum Wohle dr Umweltbelaschtung, und dau zählt dr Mensch ja nemme drzua. Na ja, und wenn es au no Profit macht, er selber hat dean G’schtank ja net.

Am Rand vom Dorf, neaba ra Fischer – Wochenendsiedlung a Fahrsilo des ausdient hat. Was dau produziert wird woiß koiner so recht. Ganz sicher aber a recht scharfa Lacha mit ma no schärfera G’schmäckle. Damit des aber net so schtanda bleibt macht ma a Rinne Richtung Günz, dau wird des scho versickera. Na ja, und neaba dana hat am Nauchbaurgründschtück ja au no jede Menge Platz. Und des Gras, des dau ei gad, des braucht der scho net mäha und dia Bäum, dia eiganga sind, dia braucht er net fälla. Also, warum dann aufrega.......

Naturschutz an dr Günz, des braucht ma ja wirklich net, und dia Leit, dia sollad ja au wissa das se auf em Dorf leabad, und ob des g’sund isch oder net, des was dau raus kommt, des interessiert ja eh net, hauptsach a Geld kommt raus. Und was soll des Landratsamt scho drgega hau, schießlich isch ma ja im Kreistag und mit em Landrat auf Du und Du. Und des mit der Wasserwirtschaft, des kriagt ma au en Griff, ma kennt ja dia Leit.

Naturschutz gad alle a, doch wenn drmit a Geld zum macha isch, nau sieht des wohl scho wieder anderscht aus. Und des au no so neaba bei, denn schtinka ka es von alloi, dau braucht ma neamad.
A Ölfleck vom Auto isch Umweltverunreinigung und koscht. A scharfa Gülle, Briah, was für a scharfes Zuig des au immer isch, wenn des em Erdreich versickrad und sichtbar Gras und Bäum eiganga lasst, Was isch nau des........ebbes zum weggucka...........