Mir send mir – was wend denn Ihr.....

Es scheint sich wia a Epidemie zum verbroita, von oba a g’fanga gad’s all meah a Schtück runter. Dr Wichtigschte zum sei, egoistisch und rechtshaberisch, so gibt’s sich Politik, geabad sich Parteia, Kloikariert d’Muslims, angeaberisch dr Bush und d’Amis und jeder der moint ebbes zum Saga zum hau.

A Merkl hält es für Selbschtverschtändlich 2500 Soldata ins Ausland zum schicka, dia uns 200 Milliona Euro koschtad. Hält es für selbschtverschtändlich das dr’zua alle JA sagad. Sia gad konsequent ihra Weag, guckt net nach links und net nach rechts, bloß alloi ihra Willa zählt. So isch es en dr Politik überall, in jeder Fraktion, bei jeder Debatte, soweit Abgeordnete anwesend send oder net grad schlaufad. Em andra mal Recht gea, selber an Fehler zua gea, des kommt ja gar net in Frage. Wär’s anderscht, nau wär mer heit net dau wo mer heit send.

Wenn es irgendwo um’s Geldvertoila gad, schreit der, der am moischta hat zerscht HIER! Und zu 90 % kriagt er es au, während dr andre, der‘s nötiger braucha dät, dia selbe Leitschunga und Aktivitäta bringt, in dr Röhre guckt. So isch’s em Haushalt vertoila bei de Beratunga in alle Regiona. Ob es dr Verei isch oder d’Regierung, ob des a Organisation isch oder a Schual. Em a andra ebbes Vergonna, des kommt ja gar net en Fraug. A jeder hält sich für da Wichtigschta, da Beschta und hat au glei plausible Erklärunga warum.........

Jeden Tag Gibt’s X Beischpiele im Straußaverkehr. Durch 1000 – Watt – Anlaga en de Auto dia junge Leit, geschtresste Hausfraua und Vertreter, Problembeladene Weiblein und Männlein kasch dau seah. Alle hand ses recht Wichtig, send recht wichtig und fahrad ohne Rücksicht auf Verluschte durch d’Schtadt, durch’s Land. Dau hat a anderer gar koin Wert net. Selber isch ma sich am Nächschta, ohne Geduld, ohne Reschpekt voar em andra. Dät es sonscht so oft und so viel Kracha?

D’Muslims kritisierad da Papscht Benedikt. Wobei er gar net so unrecht g’hett hat. Aber d’Wahrheit zum vertraga, des ka halt au net a jeder. Gleich welcha Religion es au sei, koina ka es wolla das Menscha mordat, Leaba vernichtad. Koi Glaubenskrieg, koi Terror, koine Anschläge und bedrohliche Streitigkeita ka a Religion wolla. Für da Frieden zum kämpfa hoißt lang no net Gewalt. Jetzt hand mir mal an Papscht der au andere Religiona anerkennt, jetzt hängt am sich an a paar kloine Sätz auf. Egoistisch anschtatt mit Verschtand nauchzumdenka.

Mir dend mir, was wend denn Ihr????
A Erscheinungsbild des eher all meahr na unta anschtatt nach oba führt. Mitanander isch ma schtark, mitanander ka ma ebbes leischta und au dia Meinung vom andra, kombiniert mit dr oigana ka meahr Erfolg brenga als schtur auf oiner zum beharra. A ausgeglichana Lebensweise ohne da negativa Stress und deam bekriega von andre bringt uns nach vorna, nach oba, macht uns widerschtandsfähiger und schtark.
Wia weit muass ma no sinka um des zu verschtanda und zum begreifa?