Manager und Vorstände bedienen sich......

Es isch a Frechheit was sich Manager und Vorstände, samt de Politiker alles erlauba deant. Dia deant grad a so als ob bloß für sia dr Lebensunterhalt schteigt und für des Fuaßvolk net. Dia deant grad a so als ob es a Selbschtverschtändlichkeit wär wenn sich dia ihre Gehälter bald glei um a drittel erhöhad. Und dia gröscht Frechheit isch es nau das dia selbe Herra de Arbeiter und Angeschtelle da Lohn und es Gehalt kürza deant. Ma ka ja dia Schwätzarei und Jammerei von deane scho nimmer höra, wia schlecht es deane G’sellschafta und Firma, deane ganze Konzerne gad. Aber selber wird kräftig abkassiert, ja i möcht fascht saga ander Leit Geld g’schtohla, und des no legal......

Wenn heit oiner vom Fuaßvolk a bissle an Zuschuß will, nau muass er bis auf Heller und Cent alles offa lega, sogar da Besitz, an deam er net runter beißa ka. Am liabschta dät ma eahm no des letschte Hemad nemma damit er ja net zu viel verdeant. Im Prinzip isch a jeder heit bled der überhaupt no ebbes schaffa duat und a Geld verdeant. Denn wo ma ebbes hola ka, dau kommt au scho dr Vatter Schtaat. Es derf oim ja net z’viel bleiba, damit ma des obere G’schmoiß verhalta ka.

Dau hoißt es all das a jeder a Opfer bringa muaß. Zoigad wird dau nach unta, net nach oba. Sicher gad es uns alle no relativ guat. Es fährt a jeder mit ma Auto rum, so ab und zua gönnt ma sich a feines Essa und gad a mal aus. Ma leischtad sich no an Urlaub und lasst hi und da a mal d’Sau raus. Und doch gibt es all meahr private Insolvenza, private Haushalte ganz oder sind Pleite. Es des schtört dia oba an der Regierung in Berlin überhaupt net. warum au, sia hand ja und um no meahr Anseha und Achtung im Ausland zum erhalta verschenkt ma no Gelder. Ma ka’s abwarta das au nach Hawaii zu deane Erdbebaopfer wieder Geld fließad. Nach Außa hui und inna Pfui........

Jetzt hat ma grad wieder mal an relativ niedriga Mineralölpreis, doch ma duat scho wieder rum wia ma dean künschtlich na oba treiba ka, in deam ma d’Förderung reduziert. Dia ganze Energieerhöhunga sind doch Hausg’macht und zielad nur rein auf no meahr Profit ab, auf Koschta von de Kloine. Weil de Groaße, Unternehmer, dia wälzad des wieder auf Kunschaft um damit sia net drauf hocka bleibad, wobei ma es leicht verkrafta könnt, aber dann halt a wenga weniger verdeana dät. Wia dr Kloine, dia arm Rentnerin mit ra minimala Rente des zahla soll, des interessiert doch koin von deane.

Wo isch denn des reiche Deutschland blieba? Was für a Demokratie hand mir denn no? Aber mit uns ka ma ja alles macha. d’Ungarn send auf Barrikade ganga weil sia dr Präsident voar dr Wahl ang’loga hat. Uns liagt ma scho seit Jahrzehnten a und mir land uns des g’falla. Mir zuckad bloß mit dr Achsl und land uns weiter abkassiera. D’Engländer send net so bled und zahlad jedes Jauhr an Haufa in d’EU nch Brüssl. D’Schweizer hand a Volksabschtimmung, wenn glei au net alles guat isch, aber so a Mißwirtschaft wia bei uns gibt es net.

Dau brauch ma bei uns nemme über dia frühere DDR oder über andre von Diktatora regierte Länder schimpfa und her ziah. Isch es denn bei uns ebbes andres? S’Fuaßvolk wird ausgnützt und auszoga bis auf’s Bluat damit dia Dama und Herra in dr Wirtschaft und dr Politik es sich fei macha könnad und ihre Gelder ins Ausland schaffa könnad. Es wär natürlich a Armutszeugnis im Ausland zua zum geaba das unser Schtaat eigentlich gar koi Geld net hat um andre zum Unterschtütza und das eigentlich dia Melkkuah Deutschland grad koi Milch net geah ka. Übrigens wer hat aus em reicha Ausland unsre Kataschtropha - Opfer von deane ganze Hochwasser, Schnee - Kataschtropha, Sturm - Kataschtropha usw. g’holfa? net a mal dr oigene Schtaat hat könna unbürokratisch sei.

Wo soll des alle no na ganga.......????