Krumbach in 25 Jahren

In 25 Jahren, wia wird’s dau s’Krumbach sei?
Ma ka es no net saga, ma bildad sich’s halt ei!
Was wird’s bis dau no geaba, en deaner scheana Schadt,
vielleicht isch se bis dau na a Kur – und a Kneippschtadt.

In 25 Jahren, sind’s zeha Kreisverkehr,
und Autofreie Zona machad d’Innaschtadt nau leer.
Dia wird zur Promenade wia’s jeda Kurschtadt hat,
wo jeder Einzelhandl nau mit dr Zeit au gat.

In 25 Jahren gibt’s au an Transrapit,
der fährt nau raus von Müncha und bringt dia Gäschte mit.
Ma duat dia Leit verwöhna wo immer se au send,
dau weht nau in deam Schtädtle a ganz a andrer Wend.

In 25 Jahren, dau hält dr ICE,
em Kammeltaler Baule sait ma nau glei Ade.
Des Krumbach wird nau langsam zum Mittelpunkt dr Welt,
weil jeder wichtig Groaße dau hana nau au hält.

In 25 Jahren, dau isch dia Induschtrie
Nau lang scho ganz verschwunda, es leabt Gaschtronomie.
Was braucht ma no Beamta und all dia Ämter au,
ma hat ja nau dia Kurgäscht, dia land des Geld scho dau.

In 25 Jahren, beschtimmt wird es so sei,
dau send mir von de Schuala nau au so richtig frei.
Dia koschtad eh bloß Gelder und bringad gar net viel,
denn ois, des isch ganz sicher, a andres isch des Ziel.

In 25 Jahren isch Krumbach rausgeputzt,
so das ma bis auf Günzburg und weiter au no schtuzt.
In Krumbach isch des Highlight, romantisch gar und schea,
wo’s bloß des ganz besondre viel scheaner duat no gea.

In 25 Jahren, vielleicht isch’s Schpinnerei,
dau isch des Kammelschtädle von alle Schulda frei.
Denn jeder kommt zum Kura bloß no zu uns dau her,
denn bloß des kloine Schtädtle hat dean besondra Flair.

In 25 Jahren, ma schafft heit scho dra na,
was ma dau doch so alles no schea verändra ka.
Dia Zeit, sia wird verganga, ma sieht was nau all’z geit,
vielleicht bleibt ma au schtanda und gat net mit dr Zeit.

Voar 25 Jahren, dau war ma recht weit dob,
so langsam gings nach unta und gar koin Grund zum Lob.
Es gab so viele Schwätzer, passiert isch doch net viel,
denn all dia viele Weagla, verfehlt hand sia des Ziel.

In 25 Jahren, ob ma’s erleaba ka,
dau wird ma au viel schwätza worauf ma was geaba ka.
In 25 Jahren, mir werdad es scho seah,
duats au en Krumbach an rechta Ruck mal gea.