G’sundheit muass ma sich heit wünscha,......

Es muass dr heit Angst sei wenn da Krank wirsch und zum Doktr muasch. Du als Laie derfsch deam ja net saga was dir fehlt, denn er hat ja g’schtudiert. Und nau wird mal behandlad, mal ausprobiert was denn helfa könnt. Wichtig isch dass net am Quartalsende krank wirsch, denn dau isch des Kontingent scho ausg’schöpft, ka dr’s passiera dass a Woch lang bloß Schmerzschtiller verschrieba kriasch, dia no selber zahla muasch. Dau schpielts au koi Rolla net wenn da scho jahre nix meah braucht hasch, aber des Kontingent isch weg. Und nau wird probiert, denn er ka wieder aus em volla schöpf.
Und nau gibt’s au no dia Knochadoktr, dia glei no an Praxis na als Tochterfirma an Orthopädalada hand. Ob‘s an Wert hat der koin, aber es wird verschrieba, denn sei Frau muass ja auch was verdeana, und net schlecht, wenn ma nau sieht was dia Dinger koschtad. Es dät bloß no fehla dass se a oigena Pharmafabrik aufmachad. Aber soll koiner moina dass dau net au Gelder fliaßad wenn man von beschtimmte Firma s’Zuig verschreibt.
Und nau kommand au no dia Krankakassa ins Schpiel. Deane gad’s ja au so schlecht. Aber wenn ma mal en dr obra Verwaltung a bissle reduziera dät, dia Gehälter, dia se eischiabad, wenn ma dia a wenga kürza dät, nau dät au no koiner verhungra von deane. Und was muass ma dia Häuser glei all paar Jauhr umbaua? So arg warrad dia au net beanschprucht. Aber dr Beitragszahler finanziert des ja alles. Wenn überall dia Lumparei aufhöra dät, nau wär au wieder überall Gelder dau. Bloß, wo soll ma dau afanga?