Fraua send net zum unterschätza

Arbad zum hau, des isch heit scho fascht meah wert wia an Sechser em Lotto. Oina zum finda wenn oiner koina hat, dau g’heart nau scho no Zusatzzahl dr’zua. No a wenga ärmer isch oiner dra, der vielleicht net a mal an G’sellabriaf en dr Tasch hat. An solche zum kriaga, dau send jetzt wieder a ganza Haufa künftige Schualabgänger auf dr Suche. Wobei ja vom letschta Jauhr au no net alle unterbraucht send. Aber woher jetzt Lehrschtella nemma wenn net schteahla? Dia Krumbacher Fraua - Union von dr CSU und deam Leitbildprojekt Bildung, Soziales und Jungend hat für d’Olga d’Patenschaft übernomma. Wia viela andre au, so hat sia halt koin hochqualifizierta Schualabschluß. Es isch a schprenga von Pontius bis zum Pilatus um bloß a Praktikum zum kriaga. Isch es nau a Wunder, wenn oiner grad koi Vitamin B (Beziehung) en dr Tasch hat, hundert Absaga ertoilt kriagt, nau auf krumme Toura kommt? Ma will ja au möglichscht viele en dr Stadt b’halta, sollad dahoi lerna könna, doch isch des en dr Kammelstadt denn no so ohne weitres möglich? Jetzt send mir scho wirtschaftlich a rechta dünna Region. Immer meah liest ma en dr Zeitung dass wieder der oine oder andre Betrieb aufheart. Was dr normale Bürger nau net ganz verschtanda ka, dass ma em a alteig’essana Betrieb net dia Möglichkeit gibt, sich en Krumbach anderweitig zum vergrößra. Wer woiß, vielleicht hätt der em kommenda Jauhr a paar Lehrling eig’schtellt. Vielleicht duat er’s jetzt en Thannhausa. Net jeder der au wirklich schaffa will kriagt dia Chance es zum doa, und dau ka ma nau au net glei alle über oin Kamm schera. Wenn ma‘s au ganz geara duat. Aber a guater Theoretiker muass no lang koi guater Praktiker sei, und so ka oiner mit a bissle weaniger Schualbildung ohne weiteres no a ganz a guater Lehrling werra. Aber wia g’sait, ohne Vitamin B wed dau net a mal meah s’Zeignis a guckad. Wobei ma vielleicht scho meah Wert auf Bemerkunga über’s Verhalta lega sollt als nur bloß auf d’Nota. Es dät sicherlich net schada wenn ma mehr solche Patenschafta hätt wia dia von dr Krumbacher Fraua – Union. Aber vielleicht isch des a guater erschter Schritt und es geit no Nauchahmer!