Es kommad harte Zeit auf uns zua......

Voar Neun Monat, was hat ma dau doch fer lauter scheana Schprüch heara könna, so voar dr Wahl. Sowohl von de Roate wia au von de Schwarze. Zwar isch Rom au net en neun Monat erschaffa worra, aber es isch vorwärts ganga, was ma ja bei uns net saga ka. Doch dia dau doba leabad en deam Irrglauba wia guat se send. Des Volk auf dr Schtrauß isch deane doch egal, Hauptsach sia hand alles.

Harte Zeita gand mir entgega, na ja, langsam werrad mir uns hat vom Wohlschtand verabschieda miassa, denn wia solltad denn die obre 10000 sonscht no reicher werra könna. Es wär scho mal schea zum erfahra wieso denn Schtromkoschta scho wieder schteiga müssad. Schtrom, dia saubre Energie.....? Ja, a paar Konzeren putzad sich dau sauber d’Händ an uns ab.

Aber send mir net au a wenig selber dra Schuld? Hand mir uns net von deane alle kaufa lassa? Ma ka sich heit ohne Schtrom net a mal meahr Duscha, hat koi hoißes Wasser, ja net mal a Heizung hasch und telefoniera kasch au scho bald nemme. Koi Herd meahr in dr Kuch zum kocha, alles bloß no mit Schtrom, der ja sauber von dr Schteckdos kommt.

Dia ganz Energieinduschtrie hat uns in dr Hand, und unsra Regierung ma des so, denn mit jeder oinzelna Erhöhung kassierad dia ja mit. Wo des Geld her kommt, des interessiert koi Frau Merkl meahr. Vielleicht no voar dr Wahl, aber heit sitzt se auf em hoha Roß und trabbt auf uns runter. Was bildt denn dia sich überhaupt ei, wois wohl nemme wia se dau na komma isch und von weam se em Wohlschtand leaba ka.

All no härtere Zeita fer da Arbeiter, fer’s Fuaßvolk. Benzin gad nauf, Schtrom, Schteuern gand nauf, und dia oi Mehrwertschteuer no net vollzoga wird scho wieder von andre g’schwätzt. Bald miassad mir fer Luft a Luftschteuer zahla, fer s’Sonn a Sonnaschteuer, fer da Reaga a Reagaschteuer, das mr leaba derfad a Lebensschteuer, das mer schaffa derfad, a Arbeitsschteuer..... und deane fällt beschtimmt no was andres ei.
Aber dia Kuah geit halt irgendwann koi Milch meahr, bloß, des wissad mir, aber doch dia dau doba net.