Altersvorsorge schtatt Urlaub – des isch a Frechheit.....

Es wird all no schlimmer. Abzocka wo es bloß gad, ma ka sich ja net wehra! Dia beschliaßad en Berlin ja bloß no wo ma denn em Bürger no meahr Geld raus locka ka. Mit Gerechtigkeit hat des doch nix meah zum doa. An alle Ecka und Enda muass ma schpara, an Urlaub sich zu leischta isch ja eh scho dr Luxus. Aber dia oizig Freid im Jauhr will ma jetzt au no nemma. Wo send mir denn eigentlich und wer send mir das ma mit uns so umschpringa ka?

Friahr hat ma über dia Raubritter g’schempft, dia wo ihra Volk ausbeutad hand. Ob des heit ebbes andres isch? A Zehent hat ma miassa abgeaba, a Zehntl, zeha Prozent, und heit? Ja heit sind es 50 % dia mir bloß fer da Schtaat schaffad, wo andre drmit in Urlaub fahrad und es guat lau könnad. Es isch doch jeder der schaffad bled, denn ma sieht ja, entweder duasch nix oder gasch en Politik, nau hasch dei Auskomma mit em Eikomma.

Lauter Raubritter hockad in Berlin, und dr greaschte isch dr Steinbrück. Hat doch in dr letschta Regierung dia Roat – Grea Regierung scho da Schuldaberg no meahr awachsa lau, jetzt kommt wieder a roater Finanzminischter und überlegt sich ob ma wohl net no 365 Däg em Jauhr schaffa soll damit dia Dama und Herra und au der ganze Wasserkopf verhalta werda ka. Der Schpruch „Schaffa um leaba zum könna“ war geschtern, heit hoißt es „Leaba um schaffa zum könna damit andre guat leaba könnad“.

Anscheinend wär es deane alle doch am liabschte, schaffa, viel Geld verdeana und von dem verdeanta 90 % kassiera, und grad no so viel lau das es fer a Wasser und a Brot roicht. Aber das es deane guat gau ka. Dia kassierad ab ohne Ende, verschleudrad unsre Gelder, werfad des guate Geld zum Fenschter naus und em schlechta nauch. Dia send es doch dia da deutscha Schtaat zum Bankrott g’führt hand. I woiß net was dia fer a Denkweise hand.

Alles gad nauf, kurz no bevoar dia Mehrwertschteuer erhöht wird. So ergibt sich net bloß a dreiprozentiga Erhöhung sondern sondern scho a sechsprozentiga. Und Frau Merkl und Herr Steinbrück freiad sich. Aus deane Volksvertreter send Volksverräter worra. Guat na schtanda, schea schwätza, voar allem voar dr Wahl. Groaße Schprüch macha, des kennad se, voar allem leere Schprüch wenn’s um’s Wohl von de Bürger gad. Vielleicht sollt ma über Diäta mal a Volksabschtimmung macha, des Volk entscheida lassa was dau oiner verdeana derf?