A weit’res Ringa um dia Leitstelle

Es isch scho lang im Geschpräch, d’Polizei - Einzatzzentrale soll entlaschtad werra und deshalb a integrierte Leitschtelle für Rettungsdienscht und Feuerwehr g’schaffa werra. Vorschläg hat’s scho viele geaba, Lösunga bisher nur wenig. Zum oina hat es am Geld g’fehlt und zum andra, wia all scho in unserm Land, an dr Bürokratie.

Der nuie Neu-Ulmer Feuerwehrchef, von dr BF Augschburg kommend, hat sich damals scho ebbes denkt, wia a nuie Feuerwache baut worra isch. Denn gleichzeitig hat er a größere Funkzentrale errichta lau und detmals scho drauf g’schpechtad das er nau au dia Rettungsleitschtelle zu sich hola ka. Und er war es dann au, der immer wieder sein Schtandort hoch g’hoba hat. Denn des wär natürlich a Aufwertung für sei Feuerwache und dät beschtimmt au no Geld bringa. Denn ganz sicher dät ma dann auch a scheana Miete verlanga.

Zwar isch es in de Großschtädt scho lang a so, das d’Feuerwehr au dia Alamierung vom Rettungsdienscht inne hat, doch dia hand au da Rettungsdienscht bei sich integriert. Es sind von Haus aus scho au ausgebildete Rettungssanitäter, dia in deaner Zentrale sitzad. Neu-Ulm hat dau net mehr als a „Ständig besetzte Wache“ und koine Leit mit der Ausbildung von ra Berufsfeuerwehr. Es isch immer no a Unterschied ob i jetzt a Feuerwehr alarmiera dua, wo dann alles weitere dia Nachalamierungsschtella übernehma deant oder ob i an Rettungseinsatz delegiera muass und andre Kenntnisse brauch.

In Krumbach isch alles dau. Dia Leitschtelle isch relativ modernisiert, isch im a feschta Mietverhältnis drinna, perfekte Leit sitzad denna und relativ zentral isch se au no. Ma ka net verschtanda das ma ebbes nui schaffa muass wo es des doch scho gibt. Dau ringt ma all um Gelder, versuacht im ganza Rettungsgesetz all mehr zum schpara und nau dät ma in ra heutiga Zeit des Geld zum Fenschter naus schmeißa.

A halba Million Euro koscht der zusätzliche Umbau in Neu-Ulm! A haufa Geld, des ma vielleicht au a wenga sinnvoller eisetza könnt? Dau kommt irgend so a Gutachter dr’her, von irgend oim beauftragt und macht a Gutachta. Wieder a haufa Geld beim Fenschter dussa, denn umsonscht hat der des wohl au net g’macht. Kennt denn der unsra Schtruktur? Und ob dann letztendlich des Angebot von Neu-Ulm wirklich um dia 2,2 Milliona, auf zehn Jauhr g’rechnad, billiger kommt, des isch au bloß Theorie.

Muass net jedem Kommunalpolitiker am Herza liega das a Region net ausbluatat? Nach em Wasserwirtschaftsamt, dr’Polizeidirektion, jetzt wär au no d’Rettungsleitschtelle dra. So das unsra Schtadt Krumbach immer no unbedeutender wird. Am greana Tisch, ja, dau sieht des freile alles schea aus, in dr Theorie dät ma dia Herra, dia dau entscheidat, ja au gar net braucha. Denn praktisch sollad an so ma Tisch oine sitza vom Fach send, Praktiker, dia ebbes verschtanda deant und koine Verwaltungshengscht, dia bloß Zahla em Kopf hand.

Bisher hat no koi Reform a Einschparung braucht, sondern es isch all meahr Geld g’flossa als ma denkt hat. Ma hat sich in dr Politik all scho verschpekuliert. In dr Theorie wärad mir alle scho längscht Millionär, doch in dr Praxis hat es halt net klappt. Und grad so isch es mit Entscheidunga dia auf politischer Ebene g’führt werrad. Und so wird a Versetzung der Rettungsleitschtelle von Krumbach nach Neu-Ulm wieder a Flop. Aber sag des mal als Kloiner so ma g’schtudierta Hengst!