A Macht muass ma zoiga.......

Sia send scho mal voar G’richt g’schtanda und hand am Schluss g’lachad, Manager Ackermann und Co. Damals wia Mannesmann verkauft worra isch hat ma a paar Manager no mal schnell a G’schenk g’macht, send für ihra Versaga no mal belohnt worra mit insgesamt 63 Milliona Euro. Jetzt send se wieder voar’m G’richt, und desmal soll dr Schuss nach hinta ganga.
Will ma des mit deam Recht urteila wia es Finanzamt da kloina Schteuerzahler schtrauft, dann sollad dia Herra Manager des Geldg’schenk z’ruck zahla müssa und dr’zua in dr selba Höha no a Geldschtrauf. Aber au gleichzeitig dr’zua alle andre finanzielle und wirtschaftliche Schäda traga und ohne Abfindunga von ihre Ämter alle enthoba werra. Aber vielleicht findat sich wieder mal oiner der d’Hand auf hält und von deane g’schmiert wird????

Altkanzler Gerhard Schröder hat jetzt sei Buach präsentiert. 160.000 Exemplare sind druckt worra und einige scho signiert über da Ladatisch g’wandrad. Es sei a Abrechnung mit seine Weg - und Parteigenossen, mit Merkl und Schtoiber, mit Oscar und andre dia eahn im Schtich g’lassa hand. Aber au über des häb er g’schrieba was jetzt alles falsch lauft in der Regierung und was er besser macha hätt könna. A Heuchler hoch drei! Koi Mensch hat von eahm verlangt vorzeitig des Amt na zum schmeißa und nau doch verlanga das man wieder wählt. A Schtrahlemann wia er im Buach schtad, net meah und net weaniger. Wenn er jetzt au no an Charakter hätt, bei deam Neabaverdienscht wo er neaba seiner Pension ei schiabt, nau dät er dia drei Euro pro Buach ma guata Zweck zur Verfügung schtella. A Märchenerzähler war er ja scho allwei, scho von Berufswegen als Politiker, dau isch es nämlich Bedingung, sonscht kommt ma dau gar net na. Das er jetzt au no a Märchenbuach g’schrieba hat??? Viel Zeit muass der Ma scho hau, nau muass ma sich bloß frauga wia hart oder weaniger hart er sei Geld neabaher verdient?

Das deutsche Soldata auf des selbe Niveau g’sunka sind wia ihre amerikanische Kollega isch scho zum verkrafta. Es isch ja net zum beschtreita das sich Deutsche im Urlaub in ärmere Länder mit ihrem Geld aufführad wia Graf Rotz. Bloß weil sie sich meahr leichta könnad wia andre in deam Land. Das sich aber sogenannte Vertreter vom deutscha Schtaat, und des send nu mal Soldata au, sich so aufführad isch a Schand für’s ganze Land. Mir send mir und wer send denn ihr, so nach deam Motto. So als ob dia Tote in deane Kriegsländer net meahr wia a Schtück Vieh wärad. Und voar allem, ma sollt ma jeda Soldat au a bissle Hirn zuatraua. Hand se net drauß g’lernt wia verachtat des scho von de Amis war, miassad sich dia jetzt auf dia selb Schtuf rab lassa...........

Und unsra EU in Brüssl. wenn ma’s g’nau nimmt, übrig wia a Kropf. denn des was dia in ihrer macht beschließa deant isch dr Käs von geschtern. Ma hat in manche EU - Länder selber koi Arbad, Arbeitslosigkeit hoch drei, d’Leit selber koi Geld, und jetzt beschließad dia Herra in Brüssel das ma au arme Länder für an ganz geringa Lohn von drei Euro in dr Schtund Gaschtarbeiter aufnemma soll. So als ob unsra Welt nur aus dr EU beschtanda dät, mir die reichschte Länder hättad. Wieso net in Asien, Amerika, Australien? Und wia ma unsra Merkl kennt schreit sia als erschte hier damit ihre Popularität no a bissle schteigt. A Macht hau hoißt no lang net das dia Leit au dr’mit umganga könnad......

Ja und der neue Beschluß am 2007 mit der EU - Richtlinie, mit deam Gesetz an de LKW mit deam Schtoßfänger hinta dra. Dau müssad kloine Techniker vom ADAC deane zoiga was für an Schtuß des isch. Dau hockad überbezahlte Leit am großa Tisch, von Technik koi Ahnung, beschließad a Papier des 10 Jauhr alt isch oder älter. Vor dr Technik überholt.
Aber so isch es in dr Politik, dau kommad alle dia Verschwendunga vom Schteuergeld her, unüberlegt und ohne Kenntnis wird ebbes beschlossa und nau korrigiert und no mal korrigiert und no mal..... damit alles oifach an scheana Batza Geld koscht.

Wia reich könntad mir sei wenn in dr Politik und alle dia, dia an dr Macht sitzad a bissle mit Hirn schaffa dädat......vom Arbeiter un dr „Unterschicht“ wird ja au verlangt, sonscht isch er nämlich weg vom Fenschter........