A guata Melkkuah

A Tehma zu alle Zeita, dia Anzeigetafla an de Tankschtella. Zwar war des scho allwei so, allerdings hat ma voar 20 Jauhr alle paar Monat a mal oin oder zwoi Pfennig Differenz g’habt. Dann war wieder a Zeitlang a Ruah. Heit sind es alle paar Tag, und es wird zum Lotterieschpiel günschtig zum tanka. Heit send es au glei 5 Cent, dia ma nauf gad. Wenn ma mal so überlegt wo an de Auto überall abzockt wird. Und damit ma auf em Land ja net auf dean Gedanka kommt auf Bahn oder Bus umzumschteiga, wird des Angebot reduziert und zu gleich unflexibel g’macht.

Drei mal Schteura send scho auf deam Schprit. Dann wird au no an der KFZ – Schteuer – Schraub dreht. Und jetzt findt ma wieder ebbes. Wenn scho d’Mehrwertschteuer nauf gad, nau gibt ma glei no ebbes drzua. ES muass a Bioschtoff no en da Schprit. Des macht dann von dr Ölmafia glei no mal a paar Cent aus. Na ja, wenn scho oiner na langad, nau ka a anderer en die gleich Tasch greifa und sich bediena, ob’s braucht oder net. Wenn Schtinker zahlad, nau sollad Saubermänner au a wenga für ihra Natur doa. Doch wia lang soll des no ganga? Wia lang gibt dia guat Kuah no a Milch?

3 Kommentare

Hierzu fällt mir einfach nur ein "Au dünne Späddzla gebat an broida Arsch." - Frei übersetzt: Auch Kleinvieh macht Mist.

A guada Melkkua warand mir schon immr ond wearand wir o leidr bleiba!

A Haufa Kloivieh macht meah Mischt wia a paar Groaße,
obwohl dia de gröschte Mischthäufa produzierad......
Und wia hoißt es so schea,
auf an guata Gaul schlägt ma emmer meah nei
und bloß, wenn ma a guata Kuah net gnua füttert,
na isch's bald aus mit dr Milli...............grins***

Beteiligen Sie sich!

Um zu kommentieren, öffnen Sie den Artikel auf unserer Webseite.

Zur Webseite