Am Rosenmontag geht in Krumbach der Punk ab………

Scho lang hand sich dia Faschingsgilda von Krumbach, d’Rosenmontagswitwen, d’Zylinderer und d’Schlorper überlegt, wia ma en de nächschte acht Jauhr, also bis 2018 Krumbach zur Weltschtadt macha kennt. Nach deam Diem’s Wellness – Hotel no weiter ausbaut wed, dr Pfarrer Kneipp längst Eizug g’halta hat, dät des I – Dippfle no fehla. Und so wed wohl am Rosenmontag in Krumbachs guter Stube, am Marktplatz dia Prämierung zur Winterolympiade 2018 voarg’nomma.

Baders Ursel schtimmt scho a mal ab 18 Uhr richtig ei, wenn nau a halba Schtond schpäter dear groaße Feschtzug mit Facklträger und em olympischa Fuier beim Wirtshaus Falk weg marschiert und um 19 Uhr am Marktplatz ei trifft. Was nau alles passiert, des sei no a wenig geheim, hat ma g’sait, aber ois sei sicher, nauche wed nix meah so sei wia voarher. Und dass koiner verhungrad und verdurschtad, dr’für isch au beschtens g’sorgad. Wer also so a richtiges Welt – Event mal erleaba will, am Rosenmontag voar de sechsa am Marktplatz s’Krumbach, dau gad nau nämlich dr Punk ab……..

Anno 2018 dia Winterolympiade,
dia Auslosunga, dia send ja grade,
so hat ma sich en Krumbach au denkt
ob ma sich dau net dra au hengt.
Was bis nau na Krumbach zum biata hat,
des hat g’wieß net a andra Schadt.

Duat ma of Mencha oder Garmisch gucka,
wia viel deant sich auf dau mucka,
dau hand sich Krumbachs Faschingsgilda denkt
wia wär’s wenn ma dia nach Krumbach brengt?
Alle Gegebaheita send dau scho mal voar Ort,
dau drauf geit au dr Burges scho sei Wort.

Bei de oine muass ma überall z’eascht mal baua
und dr’bei a Haufa Geld naus haua
des irgendwo so oifach wieder veraucht
weil ma des nauche wirklich nemme braucht.
A Voatroil dean dau scho Krumbach hat
als künftige Kur – und Kneipperschtadt.

Am roasiga Meteg am Markplatz dana,
direkt voar em alta Rathaus hana
findat nau au dia Auslosung schtad,
wetta wer nau da Zuaschlag hat?
Wer so ebbes no nia hat g’seah,
der muass sich des en Krumbach gea!

En Krumbach isch halt alles natürlich vorhanda,
ma muass koi Natur dadurch no verschanda,
denn dr Herrgott hat dia Kammlschtadt so beschtückt,
ja grad mit alle Details dau für scho beglückt.
Und so was, de ganze Leit von Welt
en dr heitiga Zeit so richtig eascht g’fällt.

I will na non et zu viel verraute,
vielleicht riacht a andrer no dean Brauta,
kommad auf Krumbach an da Markplatz na,
am rosiga Meteg ma alles miterleaba ka,
Dau findat nau schtadt dia Zeremonie,
ond glaubad’s dia schreibt sich nau wirklich „SIE“!.....

@by Luis Walter / 2010